काठमाडौं । सभामुख देवराज घिमिरेले आज बिहान प्रधानमन्त्री पुष्पकमल दाहालसँग बालुवाटारमा भेट गरेका छन् ।
संघीय संसद्को संयु्क्त बैठकमा सरकारको नीति तथा कार्यक्रम प्रस्तुत गरेका राष्ट्रपति रामचन्द्र पौडेललाई धन्यवाद दिने प्रस्ताव पेश गर्न नसकेपछि गम्भीर भएका घिमिरेले आज प्रधानमन्त्रीलाई भेटेर त्यसबारेमा छलफल गरेका हुन् । उनले संसदलाई प्रभावकारी बनाउने विषयसँगै केही समयदेखि भएको संसद अवरोध लगायतका विषयमा प्रधानमन्त्रीसँग छलफल भएको जानकारी दिएका छन् ।
प्रमुख प्रतिपक्षी नेपाली कांग्रेसले हिजो नीति तथा कार्यक्रम पेस गर्न दिए पनि राष्ट्रपतिलाई धन्यवाद दिन साँझ ६ बजे बोलाइएको बैठकमा अवरोध गरेको थियो । हिजै बसेको राजनीतिक दलहरुसँगको बैठकमा सभामुख घिमिरेले धन्यवाद प्रस्तावसमेत पेश हुन दिन आग्रह गर्दै अन्यथा संवैधानिक संकट आउनेतर्फ कांग्रेसलाई सचेत गराएका थिए ।

काठमाण्डौं । राष्ट्रपतिलाई सरकारका नीति तथा कार्यक्रम प्रस्तुत गर्न अवरोध नगरेको नेपाली कांग्रेसले अब संसद्मा कुनै सरकारी कार्यसूची प्रवेश गर्न नदिने जानकारी दिएको छ । मंगलवार सरकारका नीति तथा कार्यक्रमपछि कांग्रेस संसदीय दलका प्रमुख सचेतक रमेश लेखकले संसदीय छानबिन समिति नबन्दासम्म संसद् चल्न नसक्ने जानकारी दिएका हुन् ।
‘प्रधानमन्त्रीको आग्रहमा राष्ट्रपतिलाई नीति तथा कार्यक्रम प्रस्तुत गर्न दिएका हौं । संसदीय छानबिन समिति नबन्दासम्म अब कुनै सरकारी प्रस्तावमा हामी प्रवेश गर्न दिँदैनौं,’ लेखकले भने, ‘संसद् अवरोध गछौं । सरकारी कार्यसूचीमा प्रवेश गर्न दिँदैनौ ।’
सहकारी ठगीमा जोडिएका उपप्रधान एवं गृहमन्त्री रवि लामिछानेमाथि संसदीय छानबिनको मागसहित कांग्रेसले वैशाख २८ गते संसद् अवरोध गरेको थियो । प्रधानमन्त्री पुष्पकमल दाहाल प्रचण्डको आग्रहपछि राष्ट्रपति रामचन्द्र पौडेललाई सरकारका नीति तथा कार्यक्रम पेश गर्न दिएको थियो ।
कांग्रेसको अवरोधपछि वैशाख २८ गते स्थगित प्रतिनिधिसभा बैठक मंगलवार साँझ ६ बजे बस्दैछ । बैठकमा प्रधानमन्त्री प्रचण्डले राष्ट्रपतिले वाचन गरेको सरकारका नीति तथा कार्यक्रम टेबल गर्ने र धन्यवाद प्रस्ताव पेश गर्ने कार्यसूची छ ।
कांग्रेसले संसद् अवरोध गरेमा प्रधानमन्त्रीले प्रस्ताव पेश गर्ने कार्यसूची प्रभावित हुनेछ । राष्ट्रियसभाको बैठक पनि अवरुद्ध गर्ने कांग्रेसको तयारी छ ।
रविमाथि छानबिनको माग गर्दै कांग्रेसले प्रतिनिधिसभाको हिउँदे अधिवशेनमा पनि विरोध गरेको थियो ।

काठमाण्डौं । सरकारले देशभरका ५ लाख भूमिहीनलाई जग्गा उपलब्ध गराउने घोषणा गरेको छ ।
मंगलबार सरकारको नीति तथा कार्यक्रम सार्वजनिक गर्दै राष्ट्रपति रामचन्द्र पौडेलले आउँदो आर्थिक वर्ष २०८१, ८२ मा ५ लाख भूमिहीनलाई आवास सुनिश्चित गर्ने गरी सरकारले काम गर्ने जनाए ।
राष्ट्रपति पौडेलले सरकारले भू–उपयोग सम्बन्धी नीति बनाउने, तीनै तहका सरकारबीच सहकार्य बढाउँदै भूमिबाट अधिकतम लाभ लिने गरी काम गर्ने जानकारी दिए । ३ लाख हेक्टर कृषियोग्य जमिनमा सिँचाइ सुविधा पुर्‍याउनेदेखि राष्ट्रिय गौरवका सिँचाइ परियोजना निर्माणमा जोड दिइने सरकारको नीति तथा कार्यक्रममा उल्लेख छ ।
सरकारले मालपोत र नापी सम्बन्धी आधारभूत सेवा पालिकाबाटै एकीकृत रूपमा अनलाइनमार्फत प्राप्त हुने व्यवस्था मिलाउने जनाइएको छ । घरजग्गा कारोबारलाई व्यवस्थित गर्न तथा मूल्यांकन प्रणालीलाई वैज्ञानिक बनाउन कानूनी तथा संरचनागत सुधार गरिने जनाइएको छ ।

काठमाडौं । प्रधानमन्त्री पुष्पकमल दाहाल ‘प्रचण्ड’ले कांग्रेसले उठाएको मागमा आफू सकारात्मक रहेको जानकारी दिएका छन् । कांग्रेसका नेताहरू महामन्त्री गगन थापा तथा प्रमुख सचेतक रमेश लेखकसँग आज बिहान भएको छलफलमा प्रधानमन्त्री प्रचण्डले समस्याको समाधान गर्ने प्रतिबद्धता जाहेर गरेका हुन् ।
प्रमुख सचेतक लेखकका अनुसार छलफलमा प्रधानमन्त्री प्रचण्डले आज राष्ट्रपतिले नीति तथा कार्यक्रम प्रस्तुत गर्ने संसद् बैठकमा अवरोध नगर्दिन कांग्रेस नेताहरूसँग अनुरोध गरेका थिए । प्रधानमन्त्री प्रचण्डले कांग्रेसले उठाइरहेको माग आफूलाई सम्बोधन गर्नुपर्ने विषय भएको भन्ने लागिरहेको र समस्याको समाधान हुने गरेर समस्या समाधान गर्ने प्रतिबद्धता जाहेर गरेको जनाईएको छ ।
बैठकमा कांग्रेसले भने अहिले संसदीय दलको बैठक रहेको र बैठकमा प्रधानमन्त्रीको प्रतिबद्धताबारे छलफल गर्ने जनाएको थियो । बैठकले जे निर्णय गर्छ त्यही निर्णय सार्वजनिक गर्ने आफूले प्रधानमन्त्रीलाई जानकारी गराएको लेखकले जनाएका छन ।
सहकारीको बचत अपचलनमा उपप्रधान एवं गृहमन्त्री रवि लामिछानेको संलग्नता रहेको भन्दै कांग्रेसले छानबिनका लागि संसदीय समिति गठनको माग गर्दै आएको छ ।