काठमाडौं । शेयर बजार आज दोहोरो अंकको हाराहारीमा उचालिएको छ ।
नेपाल स्टक एक्सचेञ्ज लिमिटेड (नेप्से) का अनुसार आज बजार ९.०९ अंकले बढेको हो । ०.३३ प्रतिशतले बजार बढ्दा नेप्से परिसूचक २७११.७५ अंकमा पुगेको छ ।
समग्रमा बजार बढे पनि बैंकिङ, जीवन बीमा, उत्पादनमूलक, निर्जीवन बीमा र अन्य समूह राताम्मे भएका छन् भने बाँकी समूहमा हरियाली छाएको छ ।
आज ३२३ कम्पनीका १ करोड ५४ लाख ६४ हजार ५ सय ५२ कित्ता शेयर किनबेच हुँदा ७ अर्ब ९ करोड २८ लाख ७९ हजार ९ सय ४६.३९ रुपियाँ बराबरको कारोबार भएको छ ।
बजार उचालिंदा विभिन्न ८ कम्पनीका लगानीकर्ताहरुले ९ प्रतिशत बढी नाफा कमाएका छन् । कर्पोरेट डेभलपमेन्ट बैंक, सिन्धु विकास बैंक, नेपाल हाइड्रो, सप्तकोशी डेभलपमेन्ट बैंक, महिला लघुवित्त, कर्णाली डेभलपमेन्ट बैंक, जानकी फाइनान्स र सपोर्ट माइक्रोफाइनान्सका लगानीकर्ताहरुले क्रमशः १०, १०, १०, १०, १०, ९.९९, ९.९९ र ९.९७ प्रतिशतले नाफा कमाएका छन् ।
त्यस्तै गुराँस लघुवित्तका लगानीकर्ताहरुले सबैभन्दा बढी १० प्रतिशतले घाटा व्यहोरेका छन् ।
आज ङादी ग्रुप पावरको उच्च कारोबार भएको छ । उक्त कम्पनीको ३२ करोड ८१ लख ९० हजार २ सय ५९.९० रुपियाँ बराबरको कारोबार भएको नेप्सेले जानकारी दिएको छ ।
साताको पहिलो दिन आइतबार ४.९८ प्रतिशतले बजार बढ्दा ११ अर्ब ७२ करोड ६७ लाख ५६ हजार ९ सय ४.६१ रुपियाँ र हिजो मंगलबार ५१.११ अंकले बजार घट्दा १० अर्ब ४६ करोड ८३ लाख २० हजार ५ सय २१.९० रुपियाँ बराबरको कारोबार भएको थियो । सोमबार भने सार्वजनिक बिदाका कारण शेयर बजार बन्द रहेको थियो ।

काठमाडौं । नबिल बैंक लिमिटेड यो वर्ष पनि सबैभन्दा बढी कर तिर्ने बैंकका रूपमा सम्मानित भएको छ ।
सरकारले राष्ट्रिय कर दिवसको अवसरमा क्षेत्रगत रूपमा धेरै कर बुझाउने करदाताहरूलाई सम्मान गर्दै आएकोमा नबिल बैंक लिमिटेडले बैंक, वित्तीय संस्था र बिमा कारोबार क्षेत्रका तर्फ अहिलेसम्म आठ पटक यो सम्मान प्राप्त गर्न सफल भएको छ ।
यो वर्ष पनि आर्थिक वर्ष २०७९, ८० मा सबैभन्दा बढी कर तिर्ने बैंकको रूपमा नबिल बैंकलाई प्रमाणपत्रसहित सम्मान गरिएको हो ।
शनिबार आन्तरिक राजस्व विभागमा भएको विशेष कार्यक्रममा बिच अर्थमन्त्री विष्णुप्रसाद पौडेलले नबिल बैंकलाई पुरस्कृत गरेका हुन् । उक्त कार्यक्रममा नबिल बैंकको तर्फबाट वरिष्ठ नायब प्रमुख कार्यकारी अधिकृत सुजितकुमार शाक्यले सम्मान लिएका छन् ।
सरकारले हरेक वर्ष वित्तीय संस्थाहरू सहित विभिन्न विधाबाट सबै भन्दा बढी कर तिर्ने संस्था तथा व्यक्तिहरूलाई सम्मानित गर्दै आएको छ ।
यस अघि आर्थिक वर्ष २०६७, ६८, २०७०, ७१, २०७१, ७२, २०७३, ७४, २०७५, ७६, २०७६, ७७ र २०७७, ७८ को विवरणको आधारमा पनि नबिलले सबैभन्दा बढी कर तिर्ने बैंकको सम्मान पाएको थियो ।
नबिल बैंक लिमिटेड नेपालको एक अग्रणी बैंक हो । यो बैंकले जिम्मेवार संस्थाको रूपमा समग्र देश तथा समाजको विकासमा योगदान गर्न प्रतिबद्ध रहेको जनाएको छ ।
नबिलले २४ लाख भन्दा बढी सेवाग्राहीहरूलाई देशभरिको २ सय ६८ शाखा र ३ सय २० एटिएम मेसिनहरूबाट सेवा प्रदान गर्दै आएको छ । नेपाली बैंकिङ क्षेत्रमा नवीनतम सेवाको सुरुवात गर्न अग्रणी भूमिका खेलेको नबिल नेपालको बैंकिङ विकासको इतिहासमा कोसेढुङ्गाको रूपमा काम गर्दै आएको छ ।

काठमाडौं । महालक्ष्मी विकास बैंकले ग्राहकहरुलाई लक्षित गरी महालक्ष्मी हरित घर कर्जा एकल अंकको ब्याजदर ८.९९ प्रतिशतमा नै प्रदान गर्ने भएको छ ।
दिगो र वातावरणमैत्री कर्जा प्रदान गर्ने बैंकको निति बमोजिम बैंकले यस्तो कर्जा प्रदान गर्न लागेको हो । जल उर्जा, फोहोर पानी निर्मलीकरण, वायु उर्जा, सौर्य उर्जा, जैविक उर्जा लगायतका कृषि तथा वन जंगलमा आधारित भएर निर्माण गरिने घरको लागि यस्तो कर्जा प्रदान गरिनेछ ।
न्यूनतम २ वर्ष देखी अधिकतम ३० वर्ष अवधी रहने गरी बैंकले कर्जा प्रदान गर्नेछ । यस्तो कर्जा वातावरणीय विशेषता पुष्टी गर्न सक्ने तथा नवीकरणीय वा दिगो स्रोतहरुको प्रयोग गरेर गरिएका घर खरिद गर्न, घर निर्माण गर्न, अर्पाटमेन्ट खरिद गर्न, घर थपरपुर्ननिर्माण मर्मत सम्भार गर्न प्रदान गरिनेछ ।
यस्तो कार्यबाट वातावरण संरक्षण गर्न, दिगो विकासको प्रबद्र्धन गर्न तथा नेपाल राष्ट्र बैकको नियामकीय निर्देशनको पालना गर्न समेत सहयोग पुग्ने विश्वास बैंकले लिएको छ ।
बैंकको देशभर १०३ शाखा कार्यालयहरु र करिब ८ लाख ग्राहकहरु रहेका छन् ।

काठमाडौं । केही दिन यता बढिरहेको शेयर बजारमा आज फेरि पहिरो गएको छ ।
नेपाल स्टक एक्सचेञ्ज लिमिटेड (नेप्से) का अनुसार आज बजार ५१.११ अंकले घटेको हो । १.८५ प्रतिशतले बजार घट्दा नेप्से परिसूचक २७०२.६५ अंकमा ओर्लिएको छ ।
बजारमा पहिरो गएसँगै सबै समूह राताम्मे भएका छन् । होटल समूह सबैभन्दा बढी ३.१७ प्रतिशतले घटेको हो ।
आज ३१० कम्पनीका २ करोड २५ लाख ८८ हजार २ सय ४७ कित्ता शेयर किनबेच हुँदा १० अर्ब ४६ करोड ८३ लाख २० हजार ५ सय २१.९० रुपियाँ बराबरको कारोबार भएको छ ।
बजारमा उच्च अंकको पहिरो गए पनि आज आत्मनिर्भर लघुवित्तका लगानीकर्ताहरुले सबैभन्दा बढी १० प्रतिशतले नाफा कमाएका छन् ।
त्यस्तै आज ङादी ग्रुप पावर लिमिटेडका लगानीकर्ताहरुले सबैभन्दा बढी ८.९३ प्रतिशतले घाटा व्यहोरेका छन् ।
ङादी ग्रुप पावरकै उच्च कारोबार भएको छ । उक्त कम्पनीको ४६ करोड ६८ लाख ९९ हजार ८ सय ५.७७ रुपियाँ बराबरको कारोबार भएको नेप्सेले जानकारी दिएको छ ।
साताको पहिलो दिन आइतबार ४.९८ प्रतिशतले बजार बढ्दा ११ अर्ब ७२ करोड ६७ लाख ५६ हजार ९ सय ४.६१ रुपियाँ बराबरको कारोबार भएको थियो । हिजो सोमबार सार्वजनिक बिदाका कारण शेयर बजार बन्द रहेको थियो ।