काठमाडौँ । सप्तरीमा ज्योति विकास बैंकका कर्मचारीलाई कालोमोसो दलेको छ । सप्तरीको रुपनीमा मंसिर २५ गते केहि स्थानियहरुले बैंकका दुई कर्मचारीहरुलाई कालोमोसो दलेका हुन् ।
बैंकका कर्मचारीहरूले ऋण असुली गर्ने क्रममा परिवारलाई अपमान गर्ने, गालीगलौज गर्ने र मानसिक तनाव दिने गरेको आरोप स्थानियहरूले लगाएका छन्।
ऋणको किस्ता नियमित नभएको भन्दै बैंकका कर्मचारीहरू घर–घर पुगेर किस्ता बुझाउन दबाब दिने र परिवारको सामाजिक प्रतिष्ठामा नकारात्मक असर पर्ने तरिकाले व्यवहार गर्ने गरेका थिए। यसकारण स्थानीयहरूले आफ्नो असन्तोष व्यक्त गर्दै कर्मचारीमाथि कालोमोसो दलेका हुन्। उक्त घटनाको भिडियो सामाजिक सञ्जालमा भाइरल भएपछि यसले थप चासो र विवाद सिर्जना गरेको छ।
ज्योति विकास बैंकले पनि यस घटनालाई गम्भीरतापूर्वक लिएको छ। बैंकले कर्मचारीमाथि दुर्व्यवहार भएको पुष्टि गर्दै नेपाल राष्ट्र बैंकलाई जानकारी गराइएको र कालोमोसो र कुटपिट गर्ने व्यक्तिहरूको नाम संकलन गरी नियामक निकायमा पठाइएको जनाईएको छ ।

काठमाडौं । नेपाल लाइफ इन्स्योरेन्स कम्पनी लिमिटेडको मंसिर २६ गते बसेको सञ्चालक समितिको बैठकले आउँदो पुस १९ गते शनिबार पर्सा जिल्लाको वीरगञ्जस्थित होटल भिष्वामा बिहान ९ बजे २६औं वार्षिक साधारणसभा बोलाएको छ।
बैठकले हाल कायम चुक्ता पूँजीको ५ प्रतिशत बोनस शेयर र १६.०५ प्रतिशत नगद लाभांश (कर सहित) गरी कुल २१.०५ प्रतिशत लाभांश वितरणको प्रस्ताव पारित गर्नेछ।
साथै गत आर्थिक वर्षको वार्षिक प्रतिवेदन, लेखापरीक्षकको प्रतिवेदन, वासलात, नाफा नोक्सान हिसाब र नगद प्रवाह लगायतका वित्तीय विवरणहरू उपर छलफल गरी पारित गर्नुका साथै चालू आर्थिक वर्षका लागि लेखापरीक्षकको नियुक्ति गरी निजको पारिश्रमिक निर्धारण गर्नेछ।
त्यसैगरी संस्थापक शेयरधनीको तर्फबाट ३ जना सञ्चालक निर्वाचन गर्ने, कम्पनीको प्रबन्धपत्र तथा नियमावलीमा समयानुकूल संशोधन गर्ने र नियमनकारी निकायबाट कुनै निर्देशन प्राप्त भएमा सोही बमोजिम गर्न सञ्चालक समितिलाई अख्तियारी दिने प्रस्ताव पनि सभाले पारित गर्नेछ।
कम्पनीले साधारणसभा तथा लाभांश वितरण प्रयोजनार्थ पुस ७ गते एक दिनका लागि बुक क्लोज गर्ने निर्णय गरेको छ। तसर्थ बुक क्लोजको आधारमा पुस ६ गतेसम्म नेपाल स्टक एक्सचेन्ज (नेप्से) मा कायम शेयरधनीहरू मात्रै उक्त साधारणसभामा भाग लिन र लाभांश प्राप्त गर्न योग्य हुनेछन्।

काठमाडौं। ग्लोबल आइएमई बैंकले आफ्ना ग्राहकहरूलाई अब अनलाइनबाटै शेयर धितो कर्जा उपलब्ध गराउने भएको छ। बैंकले ‘फास्ट लोन अगेंस्ट शेयर’ योजना सार्वजनिक गर्दै नयाँ डिजिटल सेवाको माध्यमबाट ग्राहकहरूले शेयर धितो कर्जाका लागि आवेदन दिन सक्ने व्यवस्था मिलाएको छ।
बैंकका अनुसार ग्राहकहरूले अनलाइन प्रक्रिया पूरा गरेपछि एकै दिनमा ऋण स्वीकृति पाउनेछन्। योजना अन्तर्गत ग्राहकले आफ्नो योग्य शेयर धितो राखी अधिकतम ५० लाख रुपैयाँसम्मको कर्जा लिन सक्नेछन्। बैंकले यो कर्जा सुलभ र प्रतिस्पर्धात्मक ब्याजदरमा उपलब्ध गराउने जनाएको छ।
यो सुविधा केवल ग्लोबल आइएमई बैंकका ग्राहकका लागि मात्र उपलब्ध हुनेछ र कर्जा लिन इच्छुकको नाममा योग्य शेयर हुनु अनिवार्य छ। सम्पूर्ण प्रक्रिया अनलाइनबाट सुरु गर्न सकिए पनि अन्तिम प्रमाणीकरण र सम्झौताका लागि ग्राहकले सम्बन्धित शाखामा एकपटक उपस्थित हुनुपर्ने व्यवस्था बैंकले गरेको छ।

काठमाडौं । शेयर बजार दोहोरो अंकले घटेको छ । बजार घटेसँगै कारोबार रकम पनि ४ अर्बमा समेटिएको छ ।
नेपाल स्टक एक्सचेञ्ज लिमिटेड (नेप्से) का अनुसार आज बजार १२.५० अंक तल झरेको हो । ०.४७ प्रतिशतले बजार घट्दा नेप्से परिसूचक २५९४.८७ अंकमा ओर्लिएको छ ।
समग्रमा बजार घटे पनि बैंकिङ र म्यचुअल फण्डमा हरियाली छाउँदा बाँकी अरु सबै राताम्मे भएका छन् ।
आज ३३० कम्पनीका १ करोड १२ लाख ७२ हजार १ सय ६८ कित्ता शेयर किनबेच हुँदा ४ अर्ब ७४ लाख ५५ हजार ७७ रुपियाँको शेयर किनबेच भएको छ ।
स्वस्तिक लघुवित्त र एसवाई प्यानका लगानीकर्ताहरुले क्रमशः १० र ९.९८ प्रतिशतले नाफा कमाएका छन् ।
त्यस्तै सिटी होटल लिमिटेडका लगानीकर्ताहरुले सबैभन्दा बढी ६.२६ प्रतिशतले घाटा व्यहोरेका छन् ।
आज कुमारी बैंकको संस्थापक शेयर सबैभन्दा बढी किनबेच भएको छ । उक्त बैंकको २६ करोड १८ लाख ५५ हजार ९ सय ३० रुपियाँ बराबरको संस्थापक शेयर किनबेच भएको नेप्सले जनाएको छ ।

काठमाडौं । नेसनल लाइफ इन्स्योरेन्स कम्पनीले लिमिटेड नयाँ बोनसदर जारी गरेको छ । कम्पनीले गत आर्थिक वर्षको बीमांकीय प्रतिवेदन नेपाल बीमा प्राधिकरणले स्वीकृत गरेसँगै नयाँ बोनसदर सार्वजनिक गरेको हो ।
जसमा कुल १० वटा बीमा योजनामा बीमा अवधि अनुसार न्यूनतम ६४ रुपैयाँदेखि अधिकतम ८६ रुपैयाँसम्म बोनस दिइने भएको छ।
नयाँ बोनसदर अनुसार सावधिक बीमा योजना अन्तर्गतका बच्चाको शिक्षा एवं विवाह बीमा योजना, सामूहिक सावधिक अमृत बीमा योजना, भविष्य वृत्ति बीमा योजना, दम्पति अमृत सावधिक बीमा योजना, एकल सावधिक अमृत बीमा योजना, बचत अमृत सावधिक बीमा योजना, सावधिक अमृत बीमा योजना, सन्जीवनी अमृत सावधिक बीमा योजना, एकल सन्जीवनी सावधिक बीमा योजना र जीवन श्री सावधिक आजीवन बीमा योजनामा नयाँ बोनसदर जारी गरिएको हो ।