काठमाडौं । नेपाल राष्ट्र बैंकले निर्वाचनसंग सम्बन्धित आम्दानी तथा खर्चका लागि छुट्टै बैंक खाता खोल्न राजनीतिक दल ता उम्मेदवारहरुलाई निर्देशन दिएको छ ।
नेपाल आमनिर्वाचनसँग सम्बन्धित आम्दानी–खर्चको कारोबार पारदर्शी बनाउन राजनीतिक दल, तिनबाट प्रतिनिधित्व गर्ने उम्मेदवार (समानुपातिकसहित) तथा स्वतन्त्र उम्मेदवारका लागि छुट्टै खाता खोल्न निर्देशन दिएको हो ।
निर्वाचन आयोग नेपालको अनुरोधमा यो व्यवस्था लागू गरिएको राष्ट्र बैंकले जनाएको छ ।
निर्वाचन खर्चसम्बन्धी उक्त खाता निर्वाचन आयोगले बन्द गर्न निर्देशन नदिएसम्म सञ्चालन गर्न सकिनेछ। खाता खोल्नका लागि निर्वाचन आयोग मातहतका प्रदेश निर्वाचन कार्यालय वा जिल्ला निर्वाचन कार्यालयको सिफारिस अनिवार्य हुने जनाइएको छ ।
राष्ट्र बैंकका अनुसार निर्वाचन अभियान समूह वा त्यससँग मिल्दोजुल्दो नाममा नेपाली मुद्रा (रुपियाँ–पैसा) मा हुने आम्दानी तथा खर्चको सम्पूर्ण कारोबार यही खातामार्फत गर्नु पर्नेछ ।
यस क्रममा राष्ट्र बैंकको एकीकृत निर्देशन, २०८२ अन्तर्गत प्राकृतिक व्यक्तिको नाममा एउटै प्रकृतिको एकभन्दा बढी खाता खोल्न नपाइने व्यवस्था निर्वाचन आयोगले खाता बन्द गर्न निर्देशन नदिएसम्मका लागि शिथिल गरिएको स्पष्ट पारिएको छ।
यो व्यवस्था “क”, “ख” र “ग” वर्गका इजाजतपत्रप्राप्त बैंक तथा वित्तीय संस्थामा लागू हुनेछ। निर्वाचन खर्चलाई व्यवस्थित, पारदर्शी र निगरानीयोग्य बनाउने उद्देश्यले यस्तो व्यवस्था गरिएको राष्ट्र बैंकले जनाएको छ ।

काठमाडौं । नेपाल बीमा प्राधिकरणको अध्यक्षको जिम्मेवारी चन्द्रकला पौडेलले पाएकी छिन् ।
आज बसेको मन्त्रिपरिषद् बैठकले संघीय मामिला तथा सामान्य प्रशासन मन्त्रालयकी सचिव पौडेललाई उक्त जिम्मेवारी दिने निर्णय गरेको हो ।
पौडेललाई अर्को व्यवस्था नभएसम्मका लागि प्राधिकरणको सञ्चालक समितिको अध्यक्ष पदमा कामकाज गर्नेगरी तोक्ने निर्णय भएको सरकारका प्रवक्ता एवं गृहमन्त्री ओमप्रकाश अर्यालले जानकारी दिए ।
यसअघि प्राधिकरणको अध्यक्षको जिम्मेवारी जनकराज शर्माले सम्हाल्दै आएका थिए ।

काठमाडौं । कृषि विकास बैंकले प्रहरी वृत्त थानकोटलाई सहयोग प्रदान गरेको छ ।
गत भदौ २४ गते भएको आन्दोलनका क्रममा प्रहरी वृत्तको भवनमा आगजनी हुँदा क्षति भई नष्ट भएको भवनको जिर्णोद्धार र सेवा प्रवाहलाई सहज, सुचारु र प्रभावकारी बनाउन बैंकले कम्प्युटर तथा कार्यालय सामानहरु सहयोग प्रदान गरेको जनाएको छ ।
सहयोग हस्तान्तरण कार्यक्रममा बोल्दै कृषि विकास बैंकका उपमहाप्रबन्धक मिनराज पोखरलेले बैंकको संस्थागत सामाजिक उत्तरदायित्व कार्यक्रम अन्तर्गत रहेर यो सहयोग गरिएको र यो सहयोगले प्रहरी प्रशासनवाट जनतालाई प्रवाह हुने शान्ति सुरक्षा लगायतका सेवा प्रवाह कार्यमा सहयोग पुग्ने विश्वास लिएको जनाए ।
यसै गरी प्रहरी वृत्त थानकोटका प्रमुख प्रहरी नायब उपरीक्षक एलिजा गिरीले बैंक तथा विभिन्न सामाजिक संस्था र सहयोगि हातहरुले सुरक्षा निकाय प्रति गरेको सहयोगले समग्र प्रहरीहरुको आत्मबल बढ्ने र प्रत्यक्ष नागरीकहरुलाई दिइने शान्ती सुरक्षा कायम गर्न टेवा पुग्ने बताउँदै विपतको घडीमा प्रहरी वृत्तलाई सहयोग गर्ने सबै संस्था तथा निकायलाई हार्दिक आभार व्यक्त गरिन् ।
उक्त सहयोग हस्तान्तरण कार्यक्रममा बैंकको तर्फबाट उपमहाप्रबन्धकद्धय मिनराज पोखरेल र सुशिल हुमागाई, विभागीय प्रमुख बीना शर्मा, वरिष्ठ शाखा प्रमुख ध्रुव पौडेल,वरिष्ठ शाखा अधिकृत गीता नेपाल शर्मा, बागमती प्रदेश कार्यालय काठमाडौका वरिष्ठ शाखा प्रमुख अनिल कुमार पोखरेल, शाखा अधिकृत हरिराज थपलिया तथा बैंकको थानकोट शाखाका प्रबन्धक दील बहादु श्रेष्ठको उपस्थिति रहेको थियो भने थानकोट प्रहरी वृत्तको तर्फबाट बृत्त प्रमुख प्रहरी नायब उपरीक्षक एलिजा गिरी,प्रहरी वरिष्ठ नायब निरीक्षकद्वय अमृत भँडेल र ओमकार चन्द एवम् प्रहरी निरीक्षक दिपेन्द्र थापा लगायतका प्रहरी कर्मचारीहरुको समेत उपस्थिती रहेको थियो ।

काठमाडौं । नेशनल लाईफ इन्स्योरेन्स कम्पनी लि.ले कोशी प्रदेशमा रहेका विभिन्न शाखा कार्यालयहरुमा आवद्ध भई कार्य गर्दै आएका अभिकर्ता समूहलाई १ दिने तालिम प्रदान गरेको छ ।
प्रेरणा, प्रगति र पेशागत उत्कृष्टताको साथ प्रस्तुत गरेको मासिक योजना “मन्थन २०८२” अन्तर्गत तोकिएको बीमाशुल्क संकलन गरी छनौट भएका १२० जना अभिकर्ताहरुलाई ईलामको फिक्कल स्थित होटल एकोममा अन्तर्राष्ट्रिय प्रशिक्षक सैयद अल्फाज अहमदले बीमा क्षेत्र कै चर्चित उपाधि एमडिआरटिको लक्ष्य पूरा गर्ने उपायका बारेमा विभिन्न उदाहरण प्रस्तुत गर्दै तालिम प्रदान गरेका थिए ।
कार्यक्रममा एजेन्सी विभाग प्रमुख सुशील प्रताप राणाले अभिकर्ताहरुलाई आप्mनो पेशामा उत्कृष्टता हासिल गर्नका लागि कम्पनीले विभिन्न योजनाहरु मार्फत प्रशिक्षण प्रदान गर्दै आइरहेको परिप्रेक्षमा मासिक योजना मन्थन २०८२ जारी गरिएको जनाए ।
कोशी प्रदेशमा रहेका विभिन्न शाखामा रहि उत्कृष्ट कार्य गरी शाखा स्तरिय प्रथम, द्वितीय र तृतीय हुन सफल अभिकर्ताहरुलाई पोलिसी सर्भिसिङ्ग विभाग प्रमुख सुस्मिता राणाले मायाको चिनो प्रदान गरेका थिए ।
सहाभागी अभिकर्ताहरुले आफ्नै क्षेत्रमा चर्चित अन्तर्राष्ट्रिय प्रशिक्षकबाट तालिम लिने अवसर जुराई दिएकोमा कम्पनी प्रति हार्दिक आभार व्यक्त गरेका थिए भने सम्मानित हुने अभिकर्ताहरुले सम्मान प्राप्त गर्दा आफुले गरेको मेहेनत कदर भएको जनाएका थिए ।