काठमाडौं । नेशनल लाईफ इन्स्योरेन्स कम्पनीले मधेश प्रदेशमा उत्कृष्ट बीमा व्यवसाय गरी सिईओ क्लव सदस्य बिजेता बनेका बीमा अभिकर्ताहरुलाई हिजो एक भव्य कार्यक्रमका बीचमा सम्मान कार्यक्रम सम्पन्न गरेको हो । कम्पनीका सिईओ सुरेश खत्रीको उपस्थितिमा जनकपुरस्थित मिथिला यात्रीमा भव्य समारोहका बीचमा सिईओ क्लव बिजेताहरुलाई सम्मान गरिएको हो ।
आर्थिक वर्ष २०८१, ८२ मा तोकिएको बीमाशुल्क संकलन गरी मधेश प्रदेशबाट सिईओ क्लव सदस्य चयन भएका ७७ जना अभिकर्ताहरु सहित विभागीय प्रमुखहरु, प्रदेश प्रमुख एवं मधेश प्रदेश अन्तर्गत रहेका शाखा कार्यालयका शाखा प्रमुखहरुको सहभागितामा कम्पनीले सिईओ क्लब सदस्य बन्न सफल अभिकर्ताहरुलाई सम्मान गरेको हो ।
प्रमुख कार्यकारी अधिकृत सुरेश प्रसाद खत्रीले सिइओ क्लबका सदस्य हुन सफल अभिकर्ताहरुलाई सदस्यता वितरण तथा सम्मान गरेका थिए । नेशनल रत्न र नेशनल स्टार विजेता अभिकर्ताहरुलाई पनि नेशनल लाईफ लोगो अंकित चाँदीको मेडल, सर्टिफिकेट र खादाबाट सम्मान गरे । सोही कार्यक्रममा मधेश प्रदेशबाट आफ्नो कोड र संजालमा प्रथम द्वित्तिय र तृत्तिय हुन सफल उत्कृष्ट अभिकर्ताहरुलाई विशेष सम्मान तथा पुरस्कृत गरिएको थियो ।
सम्मानका क्रममा, प्रमुख कार्यकारी अधिकृत खत्रीले कम्पनीलाई अग्रस्थानमा पुर्‍याउन महत्वपूर्ण भुमिका खेल्ने अभिकर्ता समूहलाई उच्च प्राथमिकतामा राख्दै सबै तहका अभिकर्ताहरुको लागि अभिकर्ता मैत्री योजना ल्याउने क्रममा बार्षिक रुपमा प्रदेश स्तरिय कार्यक्रम गर्ने गरी सिइओ क्लबको अवधारणा ल्याएको र यस अवधारणा अन्तर्गत सिइओ क्लबमा नेपालभरबाट १६०० जना भन्दा बढि अभकिर्ताहरु छनौट हुनुले यो योजना अत्यन्तै सफल भएको जानकारी दिए । साथै उनीहरुलाई बधाई ज्ञापन गर्दै अझै बीमा व्यवसायमा अभिप्रेरित गरेका थिए ।
सो समारोहमा उपस्थित अभिकर्ताहरुलाई चर्चित अन्तर्राष्ट्रिय प्रशिक्षक सैयद अफ्जल अहमदले व्यवसायिक दक्षता अभिवृद्धि गर्ने सम्वन्धमा विभिन्न उदाहरण मार्फत महत्वपूर्ण तालिम प्रदान गरेका थिए । यसैगरी सो प्रदेशबाट उत्कृष्ट हुने अभिकर्ताहरु मध्ये जनकपुर शाखाका लक्ष्मण पण्डित र लाहान शाखाका श्याम चन्द्र राईले आफ्नो व्यवसायिक अनुभव व्यक्त गरेका थिए ।

काठमाडौँ । चालु आर्थिक वर्ष २०८२, ८३ को माघ २९ गतेसम्म नेपाल सरकारको कुल राजस्व संकलन ६ खर्ब ६९ अर्ब ३२ करोड ९४ लाख रुपैयाँ पुगेको छ । यो रकम वार्षिक लक्ष्यको करिब ४५.२२ प्रतिशत हो । माघ महिनासम्मको लक्ष्यको ८२.२६ प्रतिशत हो ।
अर्थ मन्त्रालयअन्तर्गत राजस्व व्यवस्थापन सूचना प्रणाली तथा महालेखा नियन्त्रक कार्यालयको विवरणअनुसार चालु आवका लागि १४ खर्ब ८० अर्ब रुपैयाँ राजस्व उठाउने लक्ष्य निर्धारण गरिएको छ । माघ मसान्तसम्म ८ खर्ब १३ अर्ब ६३ करोड १२ लाख रुपैयाँ लक्ष्य राखिएकामा ६ खर्ब ६९ अर्ब ३२ करोड ४९ लाख रुपैयाँ संकलन भएको हो ।
कर राजस्वतर्फ ५ खर्ब ९९ अर्ब ३१ करोड ४६ लाख रुपैयाँ संकलन भएको छ । यसमध्ये सबैभन्दा बढी योगदान आयकर, मूल्य अभिवृद्धि कर (भ्याट), अन्तःशुल्क तथा भन्सार महसुलबाट आएको छ । आयकरबाट १ खर्ब ५८ अर्ब ६६ करोड ६५ लाख रुपैयाँ, मूल्य अभिवृद्धि करबाट १ खर्ब ९६ अर्ब ४४ करोड १७ लाख रुपैयाँ र अन्तःशुल्कबाट १ खर्ब ५ अर्ब ४३ करोड ६० लाख रुपैयाँ राजस्व उठेको छ ।
भन्सार विभागमार्फत २ खर्ब ७८ अर्ब ४२ करोड ८१ लाख रुपैयाँ संकलन भएको छ, जुन वार्षिक लक्ष्यको ४७.३३ प्रतिशत हो । यस्तै आन्तरिक राजस्व विभागतर्फ ३ खर्ब २० अर्ब ८८ करोड ६५ लाख रुपैयाँ संकलन भएको छ, जुन लक्ष्यको ४३.५२ प्रतिशत हो ।
गैरकर राजस्वतर्फ ६५ अर्ब ७१ करोड ३ लाख रुपैयाँ उठेको छ, जुन लक्ष्यको ४२.५५ प्रतिशत हो ।
गत आर्थिक वर्षको सोही अवधिको तुलनामा समग्र राजस्व संकलनमा करिब २.८३ प्रतिशतले वृद्धि भएको देखिएको छ । सरकारका अनुसार आगामी महिनाहरूमा राजस्व परिचालनलाई थप प्रभावकारी बनाउँदै वार्षिक लक्ष्य हासिल गर्ने दिशामा पहल गरिनेछ ।

काठमाडौं । नबिल बैंक लिमिटेडले १ लाख २५ हजार कित्ता संस्थापक शेयर सर्वसाधारणका लागि बिक्री खुला गरेको छ। संस्थापक शेयरधनी जीत बहादुर श्रेष्ठको ५० हजार कित्ता, जिज्ञाशा अर्यालको ५० हजार कित्ता र जश श्रेष्ठको २५ हजार कित्ता शेयर बिक्रीमा राखेको हो।
जसमध्ये जश श्रेष्ठको नाममा रहेको २५ हजार कित्ता शेयरको प्रतिकित्ता न्यूनतम मूल्य ३०१.१० रुपैयाँ तोकिएको छ भने बाँकी शेयरको कुनै मूल्य तोकिएको छैन। यस अघि संस्थापक शेयरधनीलाई प्राथमिकता दिइसकिएकाले अब भने सर्वसाधारणका लागि बिक्री खुला गरिएको बैंकले जनाएको छ।
शेयर खरीद गर्न इच्छुक लगानीकर्ताले काठमाडौंको नक्साल, नारायणचौरस्थित बैंकको शेयर रजिष्ट्रार नबिल इन्भेष्टमेण्ट बैंकिङ्ग लिमिटेडमा शेयर आवेदन फाराम प्राप्त गरी छुट्टाछुट्टै गोप्य शिलबन्दी बोलपत्र पेश गर्नु पर्नेछ। बोलपत्र आगामी ७ दिनभित्र पेश गरिसक्नु पर्ने बैंकले जनाएको छ।

काठमाडौं । सुपर खुदी हाइड्रोपावर लिमिटेडले फागुन ५ गते सोमबारदेखि १० गते आइतबारसम्म सर्वसाधारणका लागि आईपीओ निष्काशन गर्ने भएको छ । यसअघि फागुन ४ गतेबाट निष्काशन खुला गर्ने भनिए पनि उक्त मिति एक दिन पछि सारिएको हो ।
यसअघि आयोजना प्रभावित स्थानीय बासिन्दा तथा वैदेशिक रोजगारीमा रहेका नेपालीका लागि जारी गरिएको आईपीओ बाँडफाँट सम्पन्न भएपछि कम्पनीले दोस्रो चरणमा सर्वसाधारणलाई सेयर निष्काशन गर्न लागेको हो।
कम्पनीले आफ्नो जारी पूँजी १ अर्ब ५५ करोड रुपैयाँको २० प्रतिशत बराबर हुने ३१ करोड रुपियाँको ३१ लाख कित्ता साधारण सेयर निष्काशन गर्न अनुमति पाएको थियो । सोअनुसार पहिलो चरणमा १५ लाख ५० हजार कित्ता सेयर आयोजना प्रभावित क्षेत्रका स्थानीय बासिन्दालाई र १ लाख ५५ हजार कित्ता सेयर वैदेशिक रोजगारीमा रहेका नेपालीलाई बाँडफाँट गरिसकेको छ । साथै, ७७ हजार ५०० कित्ता सेयर सामूहिक लगानी कोषका लागि पनि छुट्याइएको छ ।
अब दोस्रो चरणमा कम्पनीले आफ्ना कर्मचारीहरूका लागि ३१ हजार कित्ता सेयर सुरक्षित गरी बाँकी १२ लाख ८६ हजार ५०० कित्ता सर्वसाधारणका लागि निष्काशन गर्न लागेको बिक्री प्रबन्धकमा ग्लोबल आइएमई क्यापिटलले जनाएको छ ।
उक्त कम्पनीको शेयर १ लाख २८ हजार ६ सय ५० जनाले १०–१० कित्ताका दरले पाउने छन् ।