काठमाडौँ । चालु आर्थिक वर्ष २०८२, ८३ को माघ २९ गतेसम्म नेपाल सरकारको कुल राजस्व संकलन ६ खर्ब ६९ अर्ब ३२ करोड ९४ लाख रुपैयाँ पुगेको छ । यो रकम वार्षिक लक्ष्यको करिब ४५.२२ प्रतिशत हो । माघ महिनासम्मको लक्ष्यको ८२.२६ प्रतिशत हो ।
अर्थ मन्त्रालयअन्तर्गत राजस्व व्यवस्थापन सूचना प्रणाली तथा महालेखा नियन्त्रक कार्यालयको विवरणअनुसार चालु आवका लागि १४ खर्ब ८० अर्ब रुपैयाँ राजस्व उठाउने लक्ष्य निर्धारण गरिएको छ । माघ मसान्तसम्म ८ खर्ब १३ अर्ब ६३ करोड १२ लाख रुपैयाँ लक्ष्य राखिएकामा ६ खर्ब ६९ अर्ब ३२ करोड ४९ लाख रुपैयाँ संकलन भएको हो ।
कर राजस्वतर्फ ५ खर्ब ९९ अर्ब ३१ करोड ४६ लाख रुपैयाँ संकलन भएको छ । यसमध्ये सबैभन्दा बढी योगदान आयकर, मूल्य अभिवृद्धि कर (भ्याट), अन्तःशुल्क तथा भन्सार महसुलबाट आएको छ । आयकरबाट १ खर्ब ५८ अर्ब ६६ करोड ६५ लाख रुपैयाँ, मूल्य अभिवृद्धि करबाट १ खर्ब ९६ अर्ब ४४ करोड १७ लाख रुपैयाँ र अन्तःशुल्कबाट १ खर्ब ५ अर्ब ४३ करोड ६० लाख रुपैयाँ राजस्व उठेको छ ।
भन्सार विभागमार्फत २ खर्ब ७८ अर्ब ४२ करोड ८१ लाख रुपैयाँ संकलन भएको छ, जुन वार्षिक लक्ष्यको ४७.३३ प्रतिशत हो । यस्तै आन्तरिक राजस्व विभागतर्फ ३ खर्ब २० अर्ब ८८ करोड ६५ लाख रुपैयाँ संकलन भएको छ, जुन लक्ष्यको ४३.५२ प्रतिशत हो ।
गैरकर राजस्वतर्फ ६५ अर्ब ७१ करोड ३ लाख रुपैयाँ उठेको छ, जुन लक्ष्यको ४२.५५ प्रतिशत हो ।
गत आर्थिक वर्षको सोही अवधिको तुलनामा समग्र राजस्व संकलनमा करिब २.८३ प्रतिशतले वृद्धि भएको देखिएको छ । सरकारका अनुसार आगामी महिनाहरूमा राजस्व परिचालनलाई थप प्रभावकारी बनाउँदै वार्षिक लक्ष्य हासिल गर्ने दिशामा पहल गरिनेछ ।
