काठमाडौं । प्रोफेसनल होल्डिङ्स् लिमिटेड (साविक प्रोफेसनल एजुकेटर्स लिमिटेड) को २० औं वार्षिक साधारण सभा सम्पन्न भएको छ ।
२८ चैतमा सम्पन्न सभाले कम्पनीको आ.व. २०८१, ८२ का लागि सञ्चालक समितिको प्रतिवेदन एवं लेखापरीक्षकको प्रतिवेदनसहितको आ.व. २०८१, ८२ वार्षिक विवरण (२०८२ आषाढ मसान्तसम्मको वालसात र सोही मितिमा समाप्त आर्थिक वर्षको आय, व्यय विवरण, नाफा नोक्सान हिसाब, नगत प्रवाह विवरण र सोसँग सम्बन्धित अनुसूचीहरु) पारित गरेको हो । सभाले आ.व. २०८२, ०८३ मा कम्पनीको लेखा परीक्षण गर्नका लागि एनबीएसएम एन्ड एसोसिएट्स चार्टर्ड अकाउन्टेन्ट फर्मलाई लेखा परीक्षकमा नियुिक्त गरी निजको पारिश्रमिक निधारण गरेको छ ।
सभाले सेयरधनीहरूका लागि हाल कायम चुक्ता पुँजीको ५० प्रतिशत बोनस सेयर र सो बोनस सेयरमा लाग्ने कर प्रयोजनका लागि २.६३१६ प्रतिशत नगद लाभांश वितरण गर्ने प्रस्ताव सर्वसम्मतिले पारित गरेको छ । बोनस सेयर जारी पश्चात कम्पनीको जारी तथा चुक्ता पुँजीमा हुने वृद्धिलाई समेत सभाले अनुमोदन गरी कम्पनीको प्रबन्धपत्रमा संशोधन गर्ने प्रस्ताव पारित गरेको छ ।
सभाले कम्पनीको जारी पुँजीको निश्चित प्रतिशत सेयर सर्वसाधारणमा निष्कासन गर्ने र सो सम्बन्धमा आवश्यक सम्पूर्ण कानुनी तथा प्रशासनिक प्रक्रियाहरू पूरा गर्न सञ्चालक समितिलाई पूर्ण अख्तियारी दिने विशेष प्रस्ताव पारित गरेको छ । यस निर्णयसँगै संस्थाले सर्वसाधारणमा सेयर निष्कासन (आईपीओ) गर्ने प्रक्रियालाई औपचारिक रूपमा अगाडि बढाउँदै भविष्यका लागि नयाँ मार्ग प्रशस्त गरेको छ । साथै, कम्पनीको संस्थागत सामाजिक उत्तरदायित्वअन्तर्गत विभिन्न सामाजिक कार्यहरूमा खर्च गर्नेगरी अनुदान प्रदान गर्ने लगायत अन्य विविध सामान्य तथा विशेष प्रस्तावहरू समेत सभाद्वारा परित भएको छ ।
यसै अवसरमा कम्पनीको सहायक कम्पनी युनिग्लोब हाईयर सेकेन्डरी स्कुल काठमाडौं लिमिटेडले पनि आ.व. २०८१, ८२ का लागि सञ्चालक समितिले प्रस्ताव गरेबमोजिम हाल कायम चुक्ता पुँजीको ५ प्रतिशत बोनस सेयर र सोमा लाग्ने कर प्रयोजनका लागि ०.२६३२ प्रतिशत नगद लाभांश वितरण गर्ने प्रस्ताव स्वीकृत गरेको छ ।

काठमाडौं । नेपाल माइक्रो इन्स्योरेन्सका अध्यक्ष आशिष श्रेष्ठ पक्राउ परेका छन् ।
अध्यक्ष श्रेष्ठलाई आज सीआईबीले पक्राउ गरेको हो ।
धितोपत्रसम्बन्धी ऐन, २०६३ विपरीतको कसुर गरेको आरोपमा अनुसन्धानका क्रममा उनलाई पक्राउ गरिएको प्रहरीले जनाएको छ ।

काठमाडौं । नबिल बैंकले चालु आर्थिक वर्ष २०८२, ८३ को तेस्रो त्रैमाससम्ममा ६ अर्ब ७६ करोड ४६ लाख रुपैयाँ खुद नाफा आर्जन गरेको छ । गत आवको सोही अवधिमा ५ अर्ब ५ करोड १४ लाख रुपैयाँ नाफा गरेको बैंकले नाफा ३३.९१ प्रतिशतको बढाएको हो ।
नबिल बैंकले नोक्सानी व्यवस्थामा भारी कटौति र खराब कर्जा घटाउँदै आफ्नो व्यावसायिक दक्षतामा सुधार गरेको देखिन्छ । आधार दर र स्प्रेड रेट खुम्चिए पनि कर्जा र निक्षेप विस्तारको ठूलो आकारले बैंकको लाभांश क्षमतालाई बलियो बनाएको छ भने वित्तीय स्वास्थ्य थप सुरक्षित र सुदृढ देखिएको छ ।
यस अवधिमा खुद ब्याज आम्दानी ४० करोड ५० लाख रुपैयाँले बढेर १२ अर्ब ४५ करोड ९४ लाख रुपैयाँ पुगेको छ भने खुद फि एन्ड कमिसन १६ करोड रुपैयाँले बढेर २ अर्ब ४३ करोड ७६ लाख रुपैयाँ पुगेको छ । यसैगरी बैंकको सञ्चालन नाफा ७ अर्ब ६२ करोडबाट बढेर ९ अर्ब ६१ करोड रुपैयाँ पुगेको छ ।
बैंकले ९ महिनाको अवधिमा व्यवसाय विस्तारमा आक्रामक देखिन्छ । असार मसान्तसम्म ४ खर्ब १० अर्ब ९९ करोड रुपैयाँ कर्जा प्रवाह गरेको बैंकले चैत मसान्तसम्म कर्जा बढाएर ४ खर्ब ४७ अर्ब ९४ करोड रुपैयाँ पुर्‍याएको छ । त्यस्तै निक्षेप संकलन ५ खर्ब २४ अर्ब ६२ करोडबाट बढेर ५ खर्ब ७८ अर्ब ३४ करोड रुपैयाँ पुगेको छ ।
कर्जा विस्तारसँगै अधिक तरलता र प्रतिस्पर्धाका कारण बैंकको स्प्रेड दर गत आवको ३.५७ प्रतिशतबाट घटेर ३.३१ प्रतिशतमा झरेको छ । यसैगरी आधार दर ५.९७ प्रतिशतबाट घटेर ४.६५ प्रतिशत कायम भएको छ ।
नबिल बैंकको नाफामा वृद्धि हुनुको मुख्य कारण नोक्सानी व्यवस्थामा आएको भारी गिरावट हो । गत आवको चैतसम्म २ अर्ब २९ करोड ३२ लाख रुपैयाँ रहेको नोक्सानी व्यवस्था (इम्पेयरमेन्ट चार्ज) चालु आवको सोही अवधिमा घटेर ४७ करोड ८७ लाख रुपैयाँमा झरेको छ । बैंकको निष्क्रिय कर्जाको अनुपातमा जोखिम व्यवस्था कति बलियो छ भन्ने सूचक ‘टोटल लोन लस प्रोभिजन टु टोटल लोन’ हेर्दा १०८.२० प्रतिशत पुगेको छ, जसको अर्थ बैंकसँग खराब कर्जाभन्दा बढी प्रोभिजनिङ रकम सुरक्षित छ । बैंकले आफ्नो गैर बैंकिङ सम्पत्तिलाई पनि घटाएर ३ अर्ब ८५ करोड रुपैयाँमा झार्न सफल भएको छ ।
यस अवधिमा निष्क्रिय कर्जा गत वर्षको ४.९६ प्रतिशतबाट घटेर ४.३७ प्रतिशतमा र खुद निष्क्रिय कर्जा १.५९ प्रतिशतबाट घटेर ०.९८ प्रतिशतमा झरेको छ । पुँजी पर्याप्ततातर्फ पुँजी पर्याप्तता अनुपात १२.५१ प्रतिशत र प्राथमिक पुँजी अनुपात ९.६९ प्रतिशत रहेको छ । बैंकको सीडी रेसियो ७९.५० प्रतिशत रहेको छ, जसले बैंकमा थप कर्जा लगानी गर्ने पर्याप्त तरलता रहेको देखाउँछ ।
यसैगरी ईपीएस बढेर ३३.०२ रुपैयाँ (गत आव २५.०५ रुपैयाँ) पुगेको छ । आरओई १३.६६ प्रतिशत पीई रेसियो १६.०५ गुणा र प्रतिसेयर नेटवर्थ २४३.३० रुपैयाँ रहेको छ ।
५ अर्बको अग्राधिकार सेयरको लाभांश र अन्य नियामकीय समायोजनपछि बैंकको ९ महिनाको वितरणयोग्य नाफा ३ अर्ब ९० करोड २ लाख रुपैयाँ कायम भएको छ । गत आवसम्मको सञ्चित नाफासमेत जोड्दा कुल रिटेन्ड अर्निङ ४ अर्ब ३७ करोड ३६ लाख रुपैयाँ पुगेको छ । यो चुक्ता पुँजी ३२ अर्ब ५ करोड ६९ लाख रुपैयाँको आधारमा बैंकको वार्षिकिकृत लाभांश क्षमता २१.१६ प्रतिशत पुगेको छ ।

काठमाडौं । माछापुच्छ्रे बैंकले चालू आर्थिक वर्षको तेस्रो त्रैमाससम्म उल्लेख्य प्रगति गरेको छ।
बैंकको खुद नाफा ५०.४३ प्रतिशतले बढेर १ अर्ब ६५ करोड ८६ लाख रुपैयाँ पुगेको हो । जब कि अघिल्लो वर्ष यही अवधिमा १ अर्ब १० करोड २६ लाख रुपैयाँ मात्रै थियो।
बैंकको खुद ब्याज आम्दानी ३.४७ प्रतिशतले बढेर ४ अर्ब ३९ करोड रुपैयाँ पुगेको छ भने फि तथा कमिशन आम्दानी २८.२३ प्रतिशतले वृद्धि भएको छ। कुल सञ्चालन आम्दानी ९.९३ प्रतिशत र सञ्चालन मुनाफा १६.६४ प्रतिशतले बढेको देखिन्छ।
यसैबीच, कर्जा नोक्सानी बापत छुट्याइने प्रोभिजन घटेर ६७ करोड ३७ लाख रुपैयाँमा झरेको छ । जसले नाफा बढाउन सहयोग गरेको छ। चैत मसान्तसम्म वितरणयोग्य मुनाफा ७६ करोड २२ लाख रुपैयाँ पुगेको छ।
बैंकको प्रतिसेयर आम्दानी ६ रुपैयाँ १४ पैसाले बढेर १८ रुपैयाँ ३० पैसा पुगेको छ भने प्रतिशेयर नेटवर्थ १६८ रुपैयाँ १० पैसा कायम भएको छ। मूल्य–आम्दानी अनुपात १३.७७ गुणा रहेको छ।
कारोबार विस्तारतर्फ, बैंकले २ खर्ब १३ अर्ब रुपैयाँ निक्षेप संकलन गरी १ खर्ब ५९ अर्ब रुपैयाँ कर्जा प्रवाह गरेको छ। यी दुवै सूचक अघिल्लो वर्षको तुलनामा बढेका छन् । जसले बैंकको व्यवसाय विस्तार १२.५६ प्रतिशतले बढेको देखाउँछ।