काठमाडौं । हाल नेपालमा पश्चिमी र स्थानीय वायुको आंशिक प्रभाव रहेको छ ।
मौसम पूर्वानुमान महाशाखाका अनुसार कोशी, मधेश, बागमती, गण्डकी र लुम्बिनी प्रदेश लगायत देशको हिमाली र पहाडी भू–भागमा साधारणतया बादल लागेको छ । सुदूरपश्चिम प्रदेशको तराई भू–भागमा मौसम मुख्यतया सफा रहेको छ । कोशी, गण्डकी, लुम्बिनी प्रदेशको केही स्थानहरूमा तथा बागमती प्रदेशको एकदुई स्थानमा मध्यमसम्मको वर्षा, हिमपात भइरहेको छ ।
आज दिउँसो कोशी, मधेश, बागमती र गण्डकी प्रदेश लगायत देशको हिमाली र पहाडी भू–भागमा साधारणतया बादल लाग्ने र बाँकी भू–भागमा आंशिक बादल लाग्नेछ । कोशी, बागमती र गण्डकी प्रदेशको केही स्थानहरूमा तथा मधेश प्रदेश लगायत लुम्बिनी, कर्णाली र सुदुरपश्चिम प्रदेशको पहाडी र हिमाली भू–भागका थोरै स्थानहरूमा साथै लुम्बिनी प्रदेशको तराई भू–भागका एकदुई स्थानमा मेघगर्जन, चट्याङ्गसहित मध्यमसम्मको वर्षा, हिमपातको सम्भावना रहेको छ । लुम्बिनी र सुदूरपश्चिम प्रदेशका तराई भू–भागमा तातो दिन हुने सम्भावना रहेको छ ।
राति देशको हिमाली र पहाडी भू–भागमा साधारणतया बादल लाग्ने र तराई भू–भागमा आंशिक बादल लाग्नेछ । कोशी, मधेश, बागमती र गण्डकी प्रदेश लगायत लुम्बिनी, कर्णाली र सुदूरपश्चिम प्रदेशको हिमाली भू–भागका थोरै स्थानहरूमा हल्का वर्षारहिमपातको सम्भावना रहेको महाशाखाले जनाएको छ ।

काठमाण्डौं । आज ११औँ भूकम्प स्मृति दिवस विभिन्न कार्यक्रमका साथ देशभर मनाइँदै छ । विसं २०७२ वैशाख १२ गते गोरखा जिल्लाको बारपाकलाई केन्द्रबिन्दु बनाएर गएको विनाशकारी भूकम्पको स्मृतिमा यो दिवस मनाउन लागिएको हो।
७.६ म्याग्निच्युडको उक्त भूकम्पले ठूलो जनधनको क्षति पुर्याएको थियो। भूकम्पका कारण ८ हजार ९७९ जनाले ज्यान गुमाएका थिए भने २२ हजार ३०९ जना घाइते भएका थिए। हजारौं घर, विद्यालय, स्वास्थ्य संस्था तथा ऐतिहासिक संरचनाहरू ध्वस्त भएका थिए।
विनाशकारी भूकम्पपछि पुनर्निर्माण, पुनःस्थापना तथा सुरक्षित पूर्वाधार निर्माणलाई प्राथमिकतामा राख्दै विभिन्न कार्यक्रम सञ्चालन हुँदै आएका छन्।
यस वर्ष पनि भूकम्पीय जोखिम न्यूनीकरण, सुरक्षित संरचना निर्माण तथा विपद् पूर्वतयारीबारे जनचेतना फैलाउने उद्देश्यका साथ विभिन्न सरकारी तथा गैरसरकारी निकायले सचेतनामूलक कार्यक्रम आयोजना गरेका छन्।
भूकम्पलाई रोक्न नसकिए पनि पूर्वतयारी, सुरक्षित निर्माण र सचेतनाका माध्यमबाट सम्भावित क्षति न्यूनीकरण गर्न सकिने सन्देशसहित आज भूकम्प स्मृति दिवस मनाइँदै छ।