काठमाडौं । अमेरिकाको राजधानी वासिङ्टन डीसीमा ह्वाइट हाउस संवाददाताहरूको रात्रिभोजको क्रममा गोली चलाउने एक जना पक्राउ परेका छन् ।
शनिबार साँझको कार्यक्रममा अमेरिकी राष्ट्रपति डोनाल्ड ट्रम्प, उनकी श्रीमती मेलानिया ट्रम्प र उपराष्ट्रपति जेडी भान्स लगायत धेरै वरिष्ठ अधिकारीहरू उपस्थित थिए ।
समाचार एजेन्सी एपीका अनुसार आक्रमणकारीले होटलको बलरूम बाहिर गोली चलाएका थिए । ट्रम्प र पाहुनाहरू भित्र थिए ।
ट्रम्पले आक्रमणकारीलाई पक्राउ गरिएको जनाएका छन् । आक्रमणको करिब डेढ घण्टापछि ट्रम्पले मिडियालाई सम्बोधन गर्दै यो आक्रमण अमेरिकी संविधानमाथि आक्रमण भएको जनाए ।
ट्रम्पले भने, ‘अमेरिकी संविधानमाथि आक्रमण भएको थियो । सीक्रेट सर्विसले मेरो ज्यान बचायो । सुरक्षाकर्मीहरूले साहसपूर्वक काम गरे । गोली लागेको अधिकारी सुरक्षित छन् । उनले बुलेटप्रूफ जैकेट लगाएका थिए । आक्रमणकारीसँग शक्तिशाली गन थियो ।’
