काठमाडौं । भारतीय प्रधानमन्त्री नरेन्द्र मोदीले अहिलेको अवस्थामा पेट्रोल, डिजेल र ग्यासको प्रयोग घटाउनुपर्नेमा जोड दिएका छन् । मध्यपूर्वमा जारी युद्धका कारण विश्वभर पेट्रोल, डिजेल र ग्यासको मूल्य धेरै गुणा बढेको भन्दै उनले त्यसको प्रयोग कम गर्न भनेका हुन् ।
आइतबार हैदराबादमा भाजपाको एक कार्यक्रमलाई सम्बोधन गर्दै उनले घरबाट काम गर्ने लगायतका उपायहरू अपनाउनुपर्नेमा पनि जोड दिए ।
‘भारत यस विश्वव्यापी संकटबाट विशेष गरी प्रभावित छ, किनकि हामीसँग ठूला तेल कुवाहरू छैनन् । आज, हामीलाई घरबाट काम गर्ने जस्ता उपायहरू आवश्यकता छ ।’ मोदीले भने ।
मोदीका अनुसार विगतमा युद्धको समयमा मानिसहरूले सुन दान गर्थे । तर आज त्यो दानको आवश्यकता छैन । ‘तर हामीले एक वर्षसम्म सुन नकिन्ने प्रतिज्ञा गर्नुपर्छ, चाहे कुनै पनि कार्यक्रम किन नहोस् । सुन किन्न वा दान गर्नबाट टाढा रहनु पर्छ । यसले विदेशी मुद्रा पनि बचत गर्नेछ । ’ उनले भने ।
मोदीले एक वर्षसम्म सुन किन्नबाट टाढा रहन अपील समेत गरे । साथै, अनावश्यक सवारी साधनको प्रयोग कम गर्न र मेट्रोमा यात्रा गर्न पनि भनेका छन् ।
