काठमाडौं । प्रुडेन्सियल क्यापिटल म्यानेजमेन्ट कम्पनीले नेपाल लाइफ इन्स्योरेन्सको ५ लाख २३ हजार १ सय १२ कित्ता संस्थापक सेयर बिक्रीमा राखेको छ । बुधबारबाट गोप्य शिलबन्दी बोलपत्र आह्वान गरेको कम्पनीको सेयर खरिद गर्न पुस १९ गतेभित्र आवेदन दिनुपर्ने कम्पनीले जानकारी दिएको छ ।
इन्स्योरेन्सको बिक्री प्रबन्धक एनआइसी एशिया क्यापिटलले सूचना जारी गर्दै संस्थापक सेयरधनीका साथै जोकोही व्यक्ति, कम्पनी र संघसंस्थाले आवेदन दिनसक्ने उल्लेख गरेको छ ।
लगानीकर्ताले न्यूनतम् १० हजार कित्ताका लागि खरिद आवेदन दिनुपर्ने छ । प्रतिसेयर ३ सय २५ रुपैयाँ मूल्य तोकिएको छ । बोलपत्र धितोपत्र बिक्री प्रबन्धक एनआईसी एशिया क्यापिटलको काठमाडौं थापाथलीस्थित कार्यालयमा पेस गर्नुपर्नेछ ।

काठमाडौं । शेयर बजार लगातार तेस्रो दिन पनि घटेको छ । साताको पहिलो दिन आइतबार बजार घटेको थियो भने गतसाताको अन्तिम दिन बिहीबार पनि बजार ओरालो झरेको थियो ।
गत साताको बिहीबार ३२.७७ अंक र गत आइतबार २१.०३ अंकले घटेको बजार आज पनि १७.२३ अंकले घटेको हो । तीन दिनमा बजार ७१.०३ अंकले घटेको हो ।
यसैक्रममा आज ०.८२ प्रतिशतले बजार घट्दा नेप्से २०७०.८४ अंकमा झरेको छ ।
आज ३०७ कम्पनीका १ करोड ४३ लाख ३७ हजार ७ सय ३८ कित्ता शेयर किनबेच हुँदा ५ अर्ब २४ करोड ८७ लाख ८२ हजार ६ सय ११.३७ रुपियाँ बराबरको कारोबार भएको हो ।
समग्रमा बजार घटेपनि नेपाल इन्स्योरेन्स, इन्फिनिटी लघुवित्त, मनकामना इन्जिनियरिङ र चिरख्वा हाइड्रोको शेयर मूल्य १०, १० प्रतिशतले बढ्यो । अरु ७ कम्पनीका लगानीकर्ताले ९ प्रतिशत बढी नाफा कमाए ।
त्यस्तै बीपीडब्लू लघुवित्त, हिमालयन हाइड्रो र सूर्यज्योति लाइफका लगानीकर्ताहरुले क्रशः १०, ९.९९ र ९.८२ प्रतिशतले घाटा व्यहोरेका छन् ।
आज सोनापुर मिनिरल्सको उच्च कारोबार भएको छ । उक्त कम्पनीको १९ करोड ६६ लाख ६४ हजार ७ सय ९३.१० रुपियाँ बराबरको कारोबार भएको नेप्सेले जानकारी दिएको छ ।
साताको पहिलो दिन आइतबार बजार २१.०३ अंकले घट्दा ७ अर्ब ११ करोड १७ लाख ३३ हजार ८ सय २९.८० रुपियाँ बराबरको कारोबार भएको थियो । सोमबार क्रिसमस र मंगलबार उधौली पर्वको सार्वजनिक बिदाका काराण बजार बन्द रहेको थियो ।

काठमाडौं । हिमालयन रिइन्स्योरेन्स लिमिटेडले मंसिर २७ गतेदेखि पुस २ गतेसम्म निष्काशन खुला गरेको आईपीओ बुधबार बिहान बाँडफाँट हुने छ ।
बिक्री प्रबन्धक एनएमबि क्यापिटलका अनुसार ताज ब्यांकेट बालुवाटार, काठमाडौंमा बिहान १० बजे बाँडफाँट गर्ने तयारी गरिएको छ ।
उक्त कम्पनीको आईपीओका लागि १६ लाख ६० हजार २२ जनाले ३ करोड २२ लाख १५ हजार ७० कित्ताका लागि आवेदन दिएका छन् ।
आईपीओ भरेका सबैले १०–१० कित्ता शेयर पाउने छन् भने केहीले गोलाप्रथाबाट थप कित्ता शेयर पाउने छन् ।
यसअघि ३० लाख कित्ता वैदेशिक रोजगारीमा रहेकाहरुलाई आईपीओ बिक्री गरेको कम्पनीले २ करोड ४९ लाख कित्ता शेयर प्रतिकित्ता रु. १०० अंकित दरमा रु. १०६ प्रिमियम थप गरी प्रतिकित्ता रु. २०६ मा बिक्री गर्न लागेको हो ।
६ लाख कित्ता कम्पनीका कर्मचारी र १५ लाख कित्ता सामूहिक लगानीकोषलाई बाँडफाँट गरी बाँकी २ करोड ४९ लाख कित्ता सर्वसाधारणका लागि निष्काशन खुला गर्न लागिएको बिक्री प्रबन्धक एनएमबि क्यापिटलले जानकारी दिएको छ ।

काठमाडौं । मुक्तिनाथ विकास बैंक सम्मानित भएको छ ।
नेपाल क्लियरिङ हाउसले आफ्नो १५ औँ वार्षिकोत्सवको उपलक्ष्यमा बैंकलाई सम्मान गरेको हो । विकास बैंक समूहमा सर्वाधिक विद्युतीय कारोवार गरेको भन्दै बैंक सम्मानित गरेको हो।
काठमाडौंमा भएको कार्यक्रमकाबीच बैंकका प्रमुख कार्यकारी अधिकृत प्रद्युमन पोखरेलले पुरस्कार ग्रहण गरे ।