ताप्लेजुङ । नेकपा एमालेका महासचिव शङ्कर पोखरेलले सरकार परिवर्तन गर्न अनेक षड्यन्त्रहरू भइरहेको टिप्पणी गरेका छन् । उनले जसपा विभाजनको उदाहरण दिँदै त्यस्ता षड्यन्त्रको प्रतिरोधमा सांसदहरू नै उत्रिएर पहल लिन थालेको समेत जानकारी दिए ।
मंगलबार बिहान ताप्लेजुङमा प्रेस चौतारीले गरेको पत्रकार सम्मेलनमा बोल्दै महासचिव पोखरेलले सरकार ढाल्न भएका प्रयासलाई सांसदहरूले नै असफल पार्न सक्रिय भएको दाबी गरे । ‘अहिले पनि सरकार परिवर्तन गर्नका लागि अनेक षड्यन्त्र भइरहेका छन् । तर त्यस्तो कार्यको प्रतिरोधमा सांसदहरू आफैँले पनि सङ्गठित भएर प्रयास गर्न थालेका छन् । जसपाका सांसदहरूले त संगठितरुपमा नै एउटा प्रयास गरिसक्नुभएको छ,’ उनले भने, ‘मलाई लाग्छ, त्यो क्रम अझै बढ्न सक्छ ।’
जसपाका सांसदहरूको विद्रोहलाई उनले विधिसम्मत र स्वाभाविक भएको जनाए । ‘जनता समाजवादी पार्टीका सांसदले विद्रोह गरेर सरकार र वर्तमान सत्ता गठबन्धन जोगाउन पहल लिनुभएको छ । यो सकारात्मक पहल हो,’ उनले भने, ‘लोकतन्त्रमा दलहरूभित्र कुनै समस्या भयो भने विधिसम्मत डङ्गबाटै अघि बढ्नुपर्छ । त्यस कारण अहिले जे भयो, त्यो कानूनीरुपमा प्राप्त अधिकारको उपयोग गरेर गरिएको कार्य हो ।’
उनले मुलुकमा बलियो राष्ट्रिय शक्ति निर्माण गर्ने उद्देश्यका साथ एमालेले मिसन–०८४ को अभियान चलाएको जानकारी दिए । ‘जब राजनीतिक दलहरू धेरै हुन्छन्, कमजोर हुन्छन्, त्यसबेला बाह्य शक्तिहरूको हस्तक्षेप बढ्ने रहेछ,’ उनले भने, ‘त्यस कारण हामी नेकपा एमालेलाई यो देशको ठुलो शक्ति, बलियो शक्ति बनाएर देशलाई निकास र विकास दिन चाहन्छौँ । त्यसैकालागि पार्टीले मिसन ०८४ लाई एउटा अभियानकोरुपमा अघि बढाएको छ ।’
उनले अहिले एमालेले भागबन्डाको राजनीतिभन्दा पनि तत्काललाई स्थायी सरकार र मिसन–०८४ मा ध्यान लगाएको जनाए । ‘हामीले भागबन्डाको राजनीतिलाई महत्त्वपूर्ण विषय ठानेका छैनौँ । हामी मिसन ०८४ मा छौँ । त्यही कारण अहिले एमालेले सरकारमा महत्त्वपूर्ण मन्त्रालय बुझ्ने भन्दा पनि सरकारलाई निरन्तर चलाउने हिसाबले अघि बढेका छौँ,’ उनको दाबी छ ।

काठमाडौं । सभामुख देवराज घिमिरेले आज प्रधानमन्त्रीलगायत प्रमुख दलका शीर्ष नेताहरूसँग छलफल गर्ने भएका छन । सभामुखले आज बिहान साढे ११ बजे सिंहदरवारस्थित सभामुखको कार्यकक्षमा प्रधानमन्त्रीसहित प्रमुख दलका शीर्ष नेताहरुसँग छलफल गर्न लागेको उनको सचिवालयले जानकारी दिएको छ ।
आगामी अधिवेशन सुरू हुनुअघि नै सहमति प्रयासका लागि सभामुखले शीर्ष नेताहरुलाई छलफलका लागि बोलाएका हुन । उनले प्रधानमन्त्री पुष्पकमल दाहाल, नेपाली कांग्रेसका सभापति शेरबहादुर देउवा, नेकपा (एमाले) का अध्यक्ष केपी शर्मा ओली, राष्ट्रिय स्वतन्त्र पार्टीका सभापति रवि लामिछाने र राष्ट्रिय प्रजातन्त्र पार्टीका अध्यक्ष राजेन्द्र लिङ्देनलाई छलफलका लागि बोलाएका हुन ।
सहकारी प्रकरणमा रास्वपा सभापतिसमेत रहेका उपप्रधान एवं गृहमन्त्री रवि लामिछानेको संलग्नता सम्बन्धमा छानबिन गर्न संसदीय छानबिन समितिको माग गर्दै प्रमुख विपक्षी कांग्रेसले अघिल्लो अधिवेशनको अन्त्यतिर निरन्तर बैठक अवरोध गरेको थियो । कांग्रेसको अवरोधले सदनको कारबाही प्रभावित भएपछि सभामुखले शीर्ष बैठक बोलाएका हुन ।
सभामुखले सदनको अवरोध खुलाउन गएको अधिवेशनमा पनि दुई पटक शीर्ष बैठक आह्वान गरेका थिए । तर, सहमति प्रयास सार्थक हुन सकेको थिएन ।
सहकारी प्रकरणबारे सदनमा उठेका विषयलाई सहमतिमा टुंग्याउन मुख्य सचेतक, प्रमुख सचेतक र सचेतकसँग र कार्यव्यवस्थामा अलग अलग छलफल भएको थियो । संसदको वर्खे अधिवेशन आगामी २८ गतेदेखि सुरु हुँदैछ ।

काठमाण्डौं । नेकपा (एमाले) का अध्यक्ष केपी शर्मा ओलीले अहिले देश एमालेमय भएको दाबी गरेका छन ।
आज पार्टी केन्द्रीय कार्यालय च्यासलमा आयोजित वरिष्ठ राजनीतिज्ञ सिद्धिलाल ज्ञवाली स्मृति ग्रन्थ विमोचन कार्यक्रममा बोल्नुहुँदै अध्यक्ष ओलीले एमालेलाई लालटिन बालेर खोज्दा पनि नभेटिने बनाउँछौँ भनेर केही शक्ति लागेका भए पनि एमाले जता खोज्दा पनि भेटिने अवस्थामा पुगेको जानकारी दिएका छन । ‘खोज्दा नभेटिने होइन एमालेमय छ देश, जहाँ हेर्‍यो त्यहाँ एमाले भएको छ, जहाँ हेर्‍यो त्यहाँ एमालेमय बन्छ, त्यसैका लागि मिसन २०८४’, ओलीले भने ।
एमालेले स्वार्थका लागि होइन सफलताका लागि एकताको अभियान चलाउने उनले जनाए । राष्ट्रिय शक्तिलाई निर्णायक तहमा विकास गर्ने काममा एमाले लागेको उनले स्पष्ट पारे । एमालेलाई सिद्धाउँछौँ भनेर लागेको बेला पनि नेकपा एमाले देशको प्रमुख शक्तिको रूपमा स्थापित भएको उनले जानकारी दिए । हालै भएको दुईवटा निर्वाचन नेकपा एमालेले जितेको जनाउँदै उनले यो मिसन २०८४ को सफलताको सुरुवात भएको ओलीको भनाइ छ ।
एमालेको अभियानमा यथोचित ढङ्गले समाहित हुन उनले सबैलाई आग्रह गरे । एमालेलाई निर्णायक राष्ट्रिय शक्तिको रूपमा विकास गर्न सबैलाई एमालेको अभियानमा लाग्न ओलीले आह्वान गरे । उनले आफूलाई कम्युनिष्ट भन्ने पार्टी र व्यक्तिलाई कम्युनिस्ट पार्टीको मूलधार नेकपा एमालेमा समाहित हुन आग्रह गरे । ‘सबै आउनुस्, सबै एकजुट भएर जाऊँ’, ओलीले भने ।
ओलीले बामदेव गौतमले आफू एमालेमा फर्कन चाहेको भनि राखेको एकताको भावना निक्कै सकारात्मक भावना भएको जनाउँदै त्यस विषयमा छुट्टै बसेर छलफल गर्ने जानकारी दिए । गौतमको राष्ट्रिय एकता महाअभियान सफल होस् भन्दै उनले शुभकामना पनि दिए । अध्यक्ष ओलीले अहिले देशमा एउटा भुईँफुट्टा वर्ग जन्मिएको जनाउँदै त्याग, बलिदान र योगदान बिर्सने मात्र होइन, योगदानको समेत अवमूल्यन गर्ने प्रवृत्ति बढेको प्रति चिन्ता व्यक्त गरे । एमाले यी सबै कुरालाई चिरेर अघि बढेको उनको भनाइ छ । एकलकाटे र गैर जिम्मेवार प्रवृत्ति चिन्न र बुझ्न ओलीले आग्रह पनि गरे । ‘हाम्रो पार्टीले सही विचारको, सही प्रवृत्तिको बाटो समातेको छ, त्यो दिशा लिएको छ, त्यो अडान राखेको छ, त्यसै कारण एमाले एमाले भएको छ’, ओलीले भने ।
एमाले वैचारिक र राजनीतिक रूपमा स्पष्ट भएको उनले जानकारी दिए । गल्ती हुनसक्ने जनाउँदै उनले आत्म केन्द्रित भएर होइन, संगठन केन्द्रित सच्चिएर अघि बढ्नु पर्नेमा जोड दिए । नयाँ पुस्ताले पुराना सफलताका रेकर्ड तोड्दै नयाँ डोब बनाउनु पर्ने उनले स्पष्ट पारे ।
ओलीले चुनावी तालमेलदेखि पार्टी एकतासम्मको काम गरेर कम्युनिस्ट पार्टीलाई अघि बढाएको भए पनि त्यसलाई टिकाइराख्न नसकेको जनाए । एउटा उचाइमा पुगेको कम्युनिस्ट आन्दोलनले फेरि एक झड्का खाएको ओलीको भनाइ छ । आन्दोलनलाई देशी विदेशी शक्तिले सिद्धाउँछौँ भनेर लागेका भए पनि असफल भएका ओलीले जानकारी दिए ।
सिद्धिलाल ज्ञवाली देश र जनता प्रति निष्ठा भएको मानिस भएको ओलीले जनाए । ओलीले ज्ञवाली आन्दोलन र पार्टी प्रति निष्ठा भएको मान्छे भएको जानकारी दिए । ज्ञवाली आफ्नो भूमिको कारण कहिले काहीँ यता उता भए पनि आफ्नो कारण पार्टी र आन्दोलनबाट यता उता नहुने भएको ओलीले स्पष्ट पारे ।