काठमाण्डौं । प्रधानमन्त्री पुष्पकमल दाहाल ‘प्रचण्ड’ ले विश्वासको मत पाएका छन् । मंगलबारको प्रतिनिधिसभा बैठकमा प्रधानमन्त्री प्रचण्डले १५७ जना सांसदको विश्वासको पाएका हुन् ।
जम्मा २६८ सांसदले मत हालेका थिए । दाहालको पक्षमा १५७ मत र विपक्षमा ११० मत परेको छ, भने एकजना तटस्थ बसे । विश्वासको मतका लागि प्रचण्डले कम्तीमा १३८ मत पाउनुपर्थ्यो । उनलाई एमाले,रास्वपा, जसपा, नेकपा एस र नाउपाले समर्थन गरेका छन् ।

काठमाण्डौं । प्रधानमन्त्री पुष्पकमल दाहाल ‘प्रचण्ड’ले आज बस्ने प्रतिनिधिसभा बैठकबाट विश्वासको मत लिने भएका छन् । बुधबार बिहान ११ बजेका लागि बोलाइएको बैठकबाट प्रधानमन्त्रीले विश्वासको मत लिने संघीय संसद सचिवालयले जानकारी दिएको छ ।
गत फागुन २१ मा नेपाली कांग्रेससँगको सहकार्य तोडेर नयाँ गठबन्धन बनाएका दाहालले कांग्रेसले सरकारलाई दिएको समर्थन फिर्ता लिएपछि विश्वासको मत लिनुपर्ने प्रावधान अनुसार विश्वासको मत लिन लागेका हुन् ।
सत्ता फेरबदलसँगै प्रधानमन्त्री दाहालले १४ महिनामा तेस्रो पटक विश्वासको मत लिन लागेका हुन् । गत वर्ष पुस १० मा एमालेको समर्थनमा प्रधानमन्त्री बनेपछि उनले पुस २६ मा पहिलो पटक विश्वासको मत लिएका थिए । त्यतिखेर उनलाई २७५ मध्ये २ सय ६८ सांसदको समर्थन प्राप्त भएको थियो । त्यसपछि गत वर्षको चैत ६ गते दोस्रो पटक विश्वासको मत लिँदा उनले १७२ मत प्राप्त गरेका थिए । तेस्रो पटक लिँदा भने यो संख्या थप घट्नेछ ।
यद्यपि विश्वासको मत प्राप्त गर्न १३८ सांसदको समर्थन चाहिन्छ । त्यो संख्या सत्ता घटक ५ दलसँग पर्याप्त छ । एमालेबाट ७७, माओवादी केन्द्रका ३२, रास्वपाका २१, जनता समाजवादीका १२ र एकीकृत समाजवादीका १० सांसद छन् । त्यस्तै चार सिट भएको नागरिक उन्मुक्ति पार्टीले पनि विश्वासको मत दिन ह्विप जारी गरेको छ ।
हालसम्म प्रधानमन्त्रीलाई १५६ सांसदको समर्थन जुट्ने देखिएको छ । संसद्‌मा अहिले कांग्रेसको ८८, राप्रपाको १४, जनमतको ६, र लोसपाको चार गर्दा ११२ मत गठबन्धन बाहिर छ । जनमोर्चा र नेपाल मजदुर किसान पार्टीका दुई र स्वतन्त्र सांसद पनि हालसम्म विपक्षमा हुने देखिएको छ ।

काठमाण्डौं । नेकपा एमालेका अध्यक्ष केपी शर्मा ओलीले विनाहिचकिचाहट दिल खोलेर प्रधानमन्त्री पुष्पकमल दाहाल ुप्रचण्डुलाई विश्वासको मत दिने घोषणा गरेका छन् । अनुचित गठबन्धन छाडेर उचित गठबन्धन बनाउन प्रचण्डले लिएको पहल कदमी स्वागत योग्य रहेको ओलीले जनाए ।
संसद् भवन नयाँ बानेश्वरमा मंगलवार पार्टी संसदीय दलको बैठकलाई सम्बोधन गर्दै ओलीले देशभक्त गठबन्धन नयाँ समीकरण बनाउने पहल स्वागत योग्य रहेको जनाएका हुन् ।
‘भोलि संसद्‌मा प्रधानमन्त्रीले विश्वासको मत लिने कार्यक्रम छ । पहिले पहिलेका कुरामा प्रधानमन्त्रीले गल्ती गरेको हुनसक्छ । अहिले एकदम राम्रो छ, अनुचित गठबन्धन छाडेर उचित बनाउन पहल कदमी लिनुभयो । एक डेढ वर्ष पद सुरक्षित हुँदाहुँदै पनि देश अप्ठ्यारोमा पर्‍यो भनेर प्रधानमन्त्रीजीले अहिले चालेका कदम सकारात्मक छ’, ओलीले भने, ‘देशभक्त गठबन्धन नयाँ समीकरण बनाउने पहल स्वागत योग्य कुरा हो । उहाँले प्रधानमन्त्री माथि विश्वासको मत माग्नु हुनेछ, हामी समर्थन गर्छौं ।’
प्रचण्ड सरकार असफल भए देश दुर्घटनामा पर्ने खतरा रहेको भन्दै ओलीले विश्वासको मत दिन सांसदहरूलाई निर्देशन दिए ।
‘हामीले दिल खुलेर विनाहिचकिचाहट विश्वासको मत दिन्छौं । विश्वासको मतमा हामी सम्पूर्ण प्रतिनिधि सभाका सदस्य उपस्थित हुनेछौं’, ओलीले भने, ‘यो सरकार असफल हुनु भनेको देश ठूलो असफलतामा जानु हो । यो बेष्ट अप्सन हो कि होइन भन्ने कुरा छाडौं, यतिबेला प्रचण्डलाई विश्वासको मत दिनु बाहेक अरु अप्सन छैन ।’

काठमाण्डौं । राष्ट्रियसभाको अध्यक्षमा नारायण दाहाल निर्वाचित भएका छन् । मंगलवार बसेको राष्ट्रियसभाको बैठकले अध्यक्षमा दाहाल निर्वाचित भएको घोषणा गरेको हो ।
राष्ट्रियसभा अध्यक्षमा सत्ता गठबन्धनका तर्फबाट माओवादी सांसद दाहाल र नेपाली कांग्रेसका सांसद युवराज शर्माको उम्मेवारी परेको थियो। आज भएको मदानमा ५६ सांसद सहभागि भएका थिए ।
जसमध्ये युवराज शर्माको पक्षमा १७ सांसदले मात्र मतदान गरेका छन् । शर्माको पक्षमा बहुमत नपुगेपछि उनी राष्ट्रियसभाको अध्यक्षमा निर्वाचित हुनबाट अस्वीकृत भएका हुन् । यता दाहालको पक्षमा भने ३९ जनाले मतदान गरेपछि उनी अध्यक्षमा निर्वाचित भएका हुन् ।