काठमाडौं। नागरिक लगानी कोषले सञ्चालन गर्दै आएको उपदान तथा पेन्सन योजनामा नेशनल लघुवित्त वित्तीय संस्था लिमिटेड पनि आबद्ध भएको छ। अब उक्त संस्थाका करिब ६ सय कर्मचारी सामाजिक सुरक्षा सुविधाले आवृत्त हुनेछन्।
यस सम्बन्धी सम्झौतापत्रमा कोषका कार्यकारी निर्देशक पर्वत कुमार कार्की र लघुवित्तका प्रमुख कार्यकारी अधिकृत रामबहादुर यादवले हस्ताक्षर गरेका छन्।
कोषको उपदान तथा पेन्सन योजना एक प्रकारको दीर्घकालीन सामाजिक सुरक्षा कार्यक्रम हो, जसअन्तर्गत संगठित संस्थाहरू तथा तिनीहरूमा कार्यरत कर्मचारीहरूले योगदान आधारित वा गैर योगदान आधारित ढाँचामा आवद्ध हुन सक्छन्।
नेशनल लघुवित्तले ‘घ’ वर्गको राष्ट्रिय स्तरको वित्तीय संस्था भएर देशभर १८५ शाखामार्फत ७४ जिल्लामा वित्तीय पहुँच विस्तार गरेको छ। हाल यस लघुवित्तबाट करिब २ लाख ४१ हजार घरपरिवार लाभान्वित भइरहेका छन्।
कोषले सञ्चालित उपदान तथा पेन्सन योजनाले कर्मचारीलाई सेवा निवृत्तिपछि निश्चित आम्दानीको व्यवस्था गरिदिनुका साथै संस्थालाई पनि दीर्घकालीन मानव स्रोत व्यवस्थापनमा सहयोग पुग्ने अपेक्षा गरिएको छ।

काठमाडौं । प्रभु बैंकका ग्राहक र कर्मचारीले ललितपुरको झम्सिखेलस्थित होपफुल हराइजन नेपालमा विशेष छुट पाउने भएका छन् । बैंकका ग्राहक र कर्मचारीले होपफुलको मानसिक स्वास्थ्य सम्बन्धि सेवामा विशेष छुट पाउने गरी दुई पक्षीय समझदारी भएको हो ।
एक समारोहका बिच होपफुल हराइजन नेपालका तर्फबाट डा. प्रकृति प्रधान र प्रभु बैंकका तर्फबाट प्रमुख मार्केटिङ अफिसर रमेश कुमार श्रेष्ठले समझदारीपत्रमा हस्ताक्षर गरे ।
छुट सुविधा प्राप्त गर्नका लागि बैंकका ग्राहकले प्रभु बैंकको डेबिट कार्ड, क्रेडिट कार्ड तथा प्रिभिलेज कार्ड मध्ये कुनै एक पेश गर्नुपर्ने छ ।
होपफुल हराइजन नेपाल नेपालको एक दक्ष एवं अनुभवी विषेशज्ञको टोलीद्वारा निजी क्षेत्रबाट सञ्चालित मानसिक स्वास्थ सेवा प्रदायक संस्था हो । यस संस्थाले सबै उमेर समूहका लागि विभिन्न किसिमका मानसिक स्वास्थ सम्बन्धि सेवाहरु उपलब्ध गराउँदै आइरहेको छ ।
बैंक अफ द इयर २०२३ समेत रहेको प्रभु बैंकका नेपालभर ३१२ शाखा कार्यालय, २८६ एटीएम साथै ६८ एक्सटेन्सन काउन्टरमार्पmत करिब ३१ लाख भन्दा बढी ग्राहकलाई बैंकिङ एवं वित्तीय सेवा प्रवाह गरिरहेको छ ।

काठमाडौं । युनाइटेड अजोड इन्स्योरेन्स लिमिटेडको ३१औं वार्षिक साधारण सभा सम्पन्न भएको छ । काठमाडौंको आम्रपाली ब्याङ्क्वेट भाटभटेनीमा सोमबार साधारणसभा सम्पन्न भएको हो।
सभामा सञ्चालक समितिको वार्षिक प्रतिवेदन, २०८०, ८१ को युनाइटेड अजोड इन्स्योरेन्स लिमिटेडको लेखापरीक्षण प्रतिवेदनसहितको लेखापरीक्षण गरिएको २०८१ साल असार मसान्तसम्मको वासलात, नाफा नोक्सान हिसाब र नगद प्रवाह विवरण तथा सोसँग सम्बन्धित अनुसूची सभाबाट पारित गरिएको थियो । साथै, सञ्चालक समितिबाट पेश गरिएका सबै सामान्य र विशेष प्रस्ताव सर्वसम्मतिबाट पारित गरिएको थियो ।
कम्पनीले प्रधान कार्यालय लगायत ६ वटा प्रादेशिक कार्यालय, ३९ वटा शाखा, ४३ वटा उपशाखा कार्यालयहरु, १५ वटा बीमा काउण्टरहरु र ६ वटा तेस्रो पक्ष बीमा काउण्टरहरुबाट र ३६५ बीमा सेवा प्रदान गर्दै आएको ।

काठमाडौं । सेयर बजारमा उच्च अंकको वृद्धि भएको छ । साताको कारोबारको तेस्रो दिन मंगलबार सेयर बजार सूचक नेपाल स्टक एक्सचेञ्ज (नेप्से) ३६.८६ अंक अर्थात् १.३५ प्रतिशतले बढेर २७६२.५७ बिन्दुमा पुगेको छ ।
अघिल्लो कारोबार दिन सोमबार भने नेप्से ३५.०९ अंकले घटेर २७२५.७१ बिन्दुमा बन्द भएको थियो । यसअघिका तीन कारोबार दिन भने नेप्सेमा दोहोरो अंकको वृद्धि भएको थियो ।
मंगलबार नेप्सेमा कुल ९ अर्ब ४१ करोड रुपैयाँ बराबरको कारोबार भएको छ । अघिल्लो दिन सोमबार भने नेप्सेमा कुल ७ अर्ब ९२ करोड र आइतबार ११ अर्ब १९ करोड रुपैयाँ बराबरको कारोबार भएको थियो ।
मंगलबार नेप्सेमा कुल २०९ कम्पनीको सेयर मूल्य बढ्दा ३९ कम्पनीको घटेको छ । आज नेप्सेमा सुपर मादी हाइड्रोपावरको सेयर मूल्य सर्वाधिक अर्थात् ८.०८ प्रतिशतले बढेको छ ।
आज बैंकिङ समूहको सेयर मूल्य १.९२ प्रतिशत, विकास बैंक समूहमा १.५९ प्रतिशत, फाइनान्स समूहमा १.८२ प्रतिशत, होटल तथा पर्यटन समूहमा १.१५ प्रतिशत र जलविद्युत् समूहमा १.६७ प्रतिशतको सुधार आएको छ ।
यस्तै, लगानी समूहको सेयर मूल्य १.३८ प्रतिशतले बढ्दा लघुवित्त समूहको सेयर मूल्य १.५५ प्रतिशतले उकालो लागेको छ ।