काठमाडौं । माबिलुङ्ग इनर्जी लिमिटेडले भोलि साउन २६ गतेदेखि सर्वसाधारणका लागि आइपीओ निष्काशन गर्ने भएको छ । यसअघि आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीहरूलाई बाँडफाँट गरिसकेको कम्पनीले अब सर्वसाधारणका लागि बाँकी शेयर निष्काशन गर्न लागेको हो ।
कम्पनीले कुल जारी पूँजी ३८ करोड ५८ लाख २४ हजार रुपैयाँको ४८.९९९८ प्रतिशत अर्थात् १८ करोड ९० लाख ५३ हजार रुपैयाँ बराबरको १८ लाख ९० हजार ५३० कित्ता शेयर निष्काशन अनुमति पाएको थियो ।
पहिलो चरणमा ३ लाख ८५ हजार ८२४ कित्ता साधारण शेयर आयोजना प्रभावित क्षेत्रका बासिन्दाका लागि र १ लाख ५० हजार ४७१ कित्ता शेयर वैदेशिक रोजगारीमा रहेका नेपालीहरूको लागि बाँडफाँट गरिसकेको छ ।
अब दोस्रो चरणमा १३ करोड ५४ लाख २३ हजार ५०० रुपैयाँ बराबरको १३ लाख ५४ हजार २३५ कित्ता शेयर निष्काशन गरिनेछ । यसमा ३० हजार ९५ कित्ता शेयर कर्मचारीका लागि र ७५ हजार २३६ कित्ता शेयर सामूहिक लगानी कोषका लागि छुट्याइएको छ। बाँकी १२ लाख ४८ हजार ९०४ कित्ता शेयर सर्वसाधारण लगानीकर्ताका लागि उपलब्ध रहनेछ ।
आइपीओमा न्यूनतम १० कित्ताका लागि र अधिकतम ५० हजार कित्तासम्म आवेदन दिन सकिनेछ । आइपीओ भदौ ९ गतेसम्म खुल्ला रहनेछ भने छिटोमा साउन २९ गते बन्द हुने सम्भावना छ । कम्पनीको शेयर निष्काशन तथा बिक्री प्रबन्धक लक्ष्मी सनराइज क्यापिटल लिमिटेड रहेको छ। लगानीकर्ताले नेपाल धितोपत्र बोर्डबाट स्वीकृति प्राप्त बैंक, वित्तीय संस्था र तिनका तोकिएका शाखा कार्यालयहरूबाट सिआस्बा प्रणालीमार्फत आवेदन दिन सक्नेछन् ।
इक्रा नेपालले माबिलुङ्ग इनर्जीलाई “इक्रा एनपी इस्यूअर रेटिङ्ग सिंगल बी प्लस” प्रदान गरेको छ, जसले कम्पनीको दायित्व बहन गर्ने क्षमतामा औसत जोखिम रहेको जनाउँछ ।

काठमाडौं । भोलि साउन २६ गते पर्ने अन्तिम सोमबारको अवसरमा चन्द्रागिरी भालेश्वर महादेव मन्दिर परिसरमा विशेष भक्तिमय उत्सव तथा महाआरती कार्यक्रम आयोजना हुने भएको छ । साउन महिनाको पवित्रतासँगै महादेवको महिमा झल्काउने उद्देश्यले चन्द्रागिरी हिल्स लिमिटेडले भक्तिमय उत्सव तथा महाआरती आयोजना गर्न लागेको हो ।
कार्यक्रमअन्तर्गत पूरै दिन मन्दिर परिसरमा भक्तिमय वातावरणमा विशेष भजनकीर्तन सञ्चालन हुनेछ । साँझ ६ः३० बजेपछि विशेष महाआरती सम्पन्न हुनेछ, जसमा भक्तजनहरूलाई सहभागी हुन आमन्त्रण गरिएको छ ।
चन्द्रागिरी हिल्सले महाआरतीमा सहभागी हुन आउने भक्तजनहरूको सुविधालाई मध्यनजर गर्दै विशेष टिकट अफर सार्वजनिक गरेको छ । यस अवसरमा केबलकार टिकटमा सोमबार दिइने २५ प्रतिशत छुटका साथै साँझ ४ बजेपछि टिकट मात्र ४०० रुपैयाँमा उपलब्ध हुनेछ । यसअघि साउन महिनाका तीनवटै सोमबार चन्द्रागिरी भालेश्वर मन्दिर परिसरमा विशेष कार्यक्रम तथा महाआरती सम्पन्न भइसकेको छ । भक्तजनहरूको उत्साहजनक सहभागिता भएकाले भक्ति तथा श्रद्धा अझै गरिमामय बनाउने उद्देश्यले अन्तिम सोमबारको दिनलाई विशेष भक्तिमय उत्सवका रूपमा मनाउन लागिएको चन्द्रागिरी हिल्सले जनाएको छ ।

काठमाडौं । आइएमई मोर्टसले आर्थिक वर्ष २०२५ को ९ महिनामै २ अर्ब २१ करोड रुपैयाँ बरारको व्यापार गरेको छ । रेटिङ एजेन्सी इक्रा नेपालले गरेको रेटिङ अनुसार कम्पनीले उक्त व्यापार गरेको देखिएको हो । कम्पनीले तीन अर्ब २५ करोड रुपैयाँ बैंकिङ कर्जा प्रयोजनमा लागि रेटिङ गराएको हो ।
कम्पनीले यसअघि आव २०२४ मा दुई अर्ब ३४ करोड, आव २०२३ मा एक अर्ब ७५ करोड र आव तीन अर्ब १४ करोड रुपैयाँ बढीको व्यापार गरेको थियो । साथै, कम्पनीले २०२२ मा दुई अर्ब ३७ करोड र आव २०२१ मा एक अर्ब ८३ करोड रुपैयाँ बढीको कारोबार गरेको थियो । आइएमई मोर्टस भारतको हिन्दुजा समूहको कमर्सियल भेहिकल अशोक लेल्याण्डका लागि नेपालको आधिकारिक वितरण कम्पनीको रुपमा रहेको छ ।
कम्पनीले अशोक लेल्याण्डका सम्पूर्ण कमर्सियल भेहिकल (सिभी) मा बस, इन्टरमिडिएट कमर्सियल भेहिकल्स (आइसिभिएस), लाइट कमर्सियल भेहिकल्स (एलसिभिएस्), मिडियम कमर्सियल भेहिकल्स (एमसिभिएस), ट्रक र टिपरहरू नेपाल आयात गरेर व्यापार गर्ने गरेको छ ।

काठमाडौं । नेपाल राष्ट्र बैंकले अर्को सातादेखि वाणिज्य बैंकहरुको फुल अडिट (पूर्ण लेखापरीक्षण) गर्ने भएको छ । त्यसका लागि राष्ट्र बैंकले बंगलादेशको लेखा परीक्षण फर्म हाउलादर युनुस एन्ड कम्पनीलाई जिम्मा दिएको छ ।
लेखा परीक्षणका लागि उक्त फर्मसँग राष्ट्र बैंकले सम्झौताको तयारी समेत गरेको राष्ट्र बैंक स्रोतको भनाई छ । यस्तो लेखापरीक्षण १० वटा वाणिज्य बैंकको मात्रै हुने र अन्यको नहुने जनाइएको छ । सरकारले अन्तर्राष्ट्रिय मुद्रा कोष (आईएमएफ) बाट विस्तारित कर्जा लिने क्रममा राखेका शर्तअनुसार ती बैंकको पूर्ण लेखापरीक्षण गर्न लागिएको हो ।
हाउलादरलाई लेखापरीक्षण गरेवापत राष्ट्र बैंकले चार करोड रुपियाँ शुल्क दिने छ । यस्तो लेखापरीक्षण गर्ने काम गत बर्षदेखि सुरु गरिएको हो । आईएमएफको शर्तअनुसार स्वतन्त्र लेखा परीक्षणको लागि भन्दै विदेशी अडिट फर्म खोज्ने गरेको राष्ट्र बैंकले यस बर्ष बंगलादेशीलाई रोजेको हो । उक्त फर्मलाई छनोट गरेको विषय पनि विवादमा पर्नुका साथै अदालतमा समेत मुद्दा परेको थियो ।
हाउलादरको नेतृत्वमा राष्ट्र बैंक र सम्वन्धित् बैंकका प्रतिनिधिसमेत मिलेर बैंकको केन्द्रदेखि शाखासम्मको कारोबारको जाँच गर्दै उनीहरुले पारदर्शी र अन्तर्राष्ट्रिय अभ्यासअनुसार काम गरेनगरेको जाँच गर्ने, सम्पत्ति तथा कर्जाको गुणस्तर हेर्ने छन् ।