काठमाडौं । सेयर बजारमा उच्च अंकको गिरावट आएको छ ।
साताको कारोबारको तेस्रो दिन मंगलबार सेयर बजार सूचक नेपाल स्टक एक्सचेञ्ज (नेप्से) ४१.७८ अंकले घटेर २८३३.५७ बिन्दुमा खुम्चिएको हो ।
अघिल्लो कारोबार दिन सोमबार भने नेप्से १६.४६ अंकले बढेको थियो । त्यसअघिका तीन कारोबार दिन भने नेप्से लगातार घटेको थियो ।
मंगलबार नेप्सेमा कुल ९ अर्ब ३३ करोड रुपैयाँ बराबरको कारोबार भएको छ ।
अघिल्लो दिन सोमबार भने नेप्सेमा कुल १० अर्ब ६३ करोड रुपैयाँ बराबरको कारोबार भएको थियो । मंगलबार कारोबारमा आएकामध्ये ४६ कम्पनीको सेयर मूल्य बढ्दा २०४ कम्पनीको घटेको छ ।

काठमाडौं । माछापुच्छ्रे बैंक लिमिटेडले गत आर्थिक वर्षको चौथो त्रैमाससम्मको अपरिष्कृत वित्तीय विवरण प्रकाशित गरेको छ । विवरणअनुसार बैंकको नाफा ९२.४५ प्रतिशतले बढेको छ ।
समीक्षा अवधिमा बैंकले २ अर्ब १ करोड १४ लाख रुपियाँ खुद नाफा कमाएको छ । अघिल्लो आवको सोही अवधिमा बैंकले १ अर्ब ४ करोड ५१ लाख रुपियाँ खुद नाफा कमाएको थियो ।
समीक्षा अवधिमा बैंकको खुद ब्याज आम्दानी १५.४१ प्रतिशत र खुद फी तथा कमिशन आम्दानी १८.१६ प्रतिशत, कुल सञ्चालन आम्दानी १६.५१ प्रतिशत र सञ्चालन मुनाफा ९९.९१ प्रतिशत बढेको छ ।
नाफासँगै बैंकको प्रतिशेयर आम्दानी पनि बढेको छ । असार मसान्तसम्म बैंकको यस्तो आम्दानी ८.३१ बढेर १७.३१ रुपियाँ पुगेको छ । असार मसान्तसम्ममा बैंकको वितरणयोग्य मुनाफा १ अर्ब ७ करोड रुपैयाँ र वितरणयोग्य प्रतिशेयर आम्दानी ९.२३ रुपियाँ, मूल्य आम्दानी अनुपात १४.९९ गुणा र प्रतिशेयर नेटवर्थ १६३.८० रुपियाँ रहेको छ ।
११ अर्ब ६२ करोड १३ लाख रुपियाँ चुक्ता पुँजी रहेको यस बैंकको जगेडा कोषमा ७ अर्ब ४१ करोड रुपियाँ सञ्चित छ ।

काठमाडौं । एनएमबि बैंकले आफ्नो कर्पोरेट सामाजिक उत्तरदायित्व अन्तर्गत नेपाल प्रहरीलाई १६ फिटको सेल्फबेलिंग राफ्ट, लाइफ ज्याकेट र अन्य सम्बन्धित विपद् उद्धार उपकरणहरू हस्तान्तरण गरेको छ ।
उक्त कार्यक्रम काठमाडौं उपत्यका प्रहरी कार्यालय, रानीपोखरी, काठमाडौंमा आज आयोजना गरिएको थियो ।
समारोहमा, एनएमबी बैंकका प्रमुख कार्यकारी अधिकृत गोविन्द घिमिरेले नेपाल प्रहरीका अतिरिक्त महानिरीक्षक (एआईजी) टेकबहादुर तामाङलाई उद्धार उपकरण हस्तान्तरण गरे ।
मनसुनको समयमा बाढी, डुबान र अन्य पानी सम्बन्धी विपद् र आपतकालीन अवस्थाको उच्च सम्भावनालाई ध्यानमा राख्दै, बैंकले यो सहयोगले प्रहरी बलको सञ्चालन क्षमतामा उल्लेखनीय वृद्धि गर्ने बैंकको विश्वास छ ।
बैंकले देशभर २०२ शाखा, १८७ एटीएम र ९ विस्तारित काउन्टरहरू मार्फत सेवा प्रदान गर्दै आएको छ ।

काठमाडौं । हिमालयन एभरेष्ट इन्स्योरेन्स (एचइआई) ले फोहोर व्यवस्थापनमा नवीन प्रयास थालेको छ । इन्स्योरेन्स र डोको रिसाइक्लर्सबीच सहकार्य भएसँगै प्रमुख कार्यालयको फोहोर डोको रिसाइक्लर्सले संकलन गरिरहेको छ ।
डोको रिसाइक्लर्स एक वातावरणीय संस्थाको रुपमा फोहोर संकलन, वर्गीकरण र प्रशोधनको काम गर्छ । वातावरणमैत्री उद्यमका रुपमा आफूलाई स्थापित गर्ने लक्ष्यसहित कम्पनीले फोहोर व्यवस्थापनमा जोड दिएको छ ।
हिमालयन एभरेष्ट इन्स्योरेन्सकी प्रमुख कार्यकारी अधिकृत अन्जु श्रेष्ठले भनिन्, “वातावरण संरक्षण र दिगोपन हाम्रो प्राथमिकता हो, फोहोर डम्पिङ साइटमा जान नदिन र पुनः प्रयोगमा ल्याउन हामीले महत्वपूर्ण कदम चालेका छौँ ।” यस्ता फोहोरलाई जिम्मेवार रुपमा व्यवस्थापन गर्ने उद्देश्य राखेर इन्स्योरेन्सले डोकोसँग सहकार्य गरेको सिईओ श्रेष्ठले जनाईन ।
हिमालयन एभरेष्ट इनस्योरेन्सबाट उत्पन्न करिब ८५ प्रतिशत फोहोरको हिस्सा सुक्खा प्रकारको भएकाले यसलाई डोकोले नै पुनः प्रयोगका लागि योग्य सामग्री बनाउने काम गर्छ । कार्यालयमा सकेसम्म कागजलाई कम प्रयोग गर्ने र डिजिटलाइजेशन प्रणालीमा रुपान्तरण गर्दै जाने कम्पनीको योजना छ ।
एचइआईले भनेको छ, “दीर्घकालीन दिगो वृद्धि सुनिश्चित गर्ने दिशामा चालिएको एक महत्वपूर्ण कदम हो, डिजिटलाइजेशनको यात्रासँगै कम्पनीले कार्बन उत्सर्जन घटाउने प्रतिवद्धतासमेत व्यक्त गर्दछौँ ।” यो योजनालाई शाखाहरुमा पनि विस्तार र कार्यान्वयन गर्ने इन्स्योरेन्सको तयारी छ ।